ЖҰМЫСШЫ МАМАНДЫҚТАР ЖЫЛЫ: АДАЛ ЕҢБЕК – АЗАМАТТЫҚ ҚҰНАРЫ

Сегіз жыл ғұмырын мектеп қабырғасындағы қажырлы еңбекке арнаған жан – елдің ықыласына бөленуге әбден лайық. Күн сайын ұжымның жайлы да таза ордасын қамтамасыз етіп, ұрпақ тәрбиесіне жанама болса да, өз үлесін қосып жүрген қарапайым еңбеккер – Шығыс Қазақстан облысы, Тарбағатай ауданы, Асусай ауылындағы «Асусай мектеп-балабақша кешені» КММ қамту қызметкері Қужкаева Қарлығаш Қалымбекқызы.

Мектепте ол – тазалық пен ұқыптылықтың жарқын үлгісі. Таң шапағымен оянып, күндіз-түні тыным таппай, оқу ордасын жайнатып жүреді. Әрбір бөлменің тазалығы мен жинақылығы – оның қажырлы еңбегінің жемісі. Әріптестері оны еңбекқорлығы мен тиянақтылығы үшін ерекше құрметтейді.

Қарлығаш Қалымбековна бос уақытында тоғызқұмалақ ойнап, қолөнер бұйымдарын жасап, үй шаруасымен айналысқанды жаны қалайды. Әр маусымда үйін түрлендіріп, гүл егу – оның сүйікті ісі. Оның қолынан шыққан әрбір дүние жүрек жылуы мен мейірімділіктің нышанындай.

«Адам еңбексіз жетістікке жетпейді» деген қағиданы берік ұстанатын Қарлығаш апай – қарапайымдылығы мен адалдығының арқасында көпшіліктің сүйіспеншілігіне бөленген жан. Осындай еңбек адамдарын қадірлеу – баршамыздың азаматтық борышымыз. Еңбегімен елге үлгі болған жандардың есімі мәңгілікке сақталады.

Шығыс Қазақстан облыстық ұйымы