ЖАС КЕЛСЕ – ІСКЕ

Білім мен жаңашылдықты серік еткен жас ұстаз – Мадина Асқарова.

Бүгінгі жас маман – ертеңгі білімді ұрпақтың қалыптасуына тікелей ықпал ететін тұлға. Солардың қатарында ұстаздық жолды шын жүректен таңдап, шәкірт тәрбиесіне бар күш-жігерін арнап келе жатқан жас педагог – Асқарова Мадина Бұхарбекқызы бар.

Асқарова Мадина Бұхарбекқызы 1999 жылы Темір ауданы, Шұбарқұдық кентінде дүниеге келген. 2017 жылы №1 Шұбарқұдық мектеп-гимназиясын аяқтап, 2021 жылы Қ.Жұбанов атындағы Ақтөбе өңірлік университетін үздік бітірді. Бүгінде туған жеріндегі Шұбарқұдық гимназиясында орыс тілі мен әдебиеті пәнінің мұғалімі ретінде еңбек етіп келеді.

Жас ұстаз ретінде әр сабағын мазмұнды, жаңашыл бағытта өткізуге тырысады. Ол оқушылардың білімге деген қызығушылығын арттыруда, тәрбие мен оқытуды ұштастыруда, әдістемелік ізденісте үздіксіз еңбек етіп келеді. Өз ісіне жоғары жауапкершілікпен қарап, кәсіби өсу жолында да табысты қадамдар жасауда.

Жас маман бола тұра Мадина Бұхарбекқызы қысқа уақыт ішінде бірқатар кәсіби жетістіктерге қол жеткізді. Ол «Дарынды балаға – талантты ұстаз» педагогикалық идеялар байқауының облыстық кезеңінде І орынды иеленіп, республикалық кезеңінде жүлделі ІІІ орынға ие болды. Сонымен қатар, «Өрлеу» Біліктілікті арттыру ұлттық орталығы ұйымдастырған «Педагогикалық идеялар панорамасы» байқауының аймақтық кезеңінде ІІІ орынды жеңіп алды. «Үздік ашық сабақ» атты республикалық педагогикалық байқауда да І орынды иеленіп, кәсіби біліктілігін тағы бір мәрте дәлелдеді.

Ақтөбе облыстық ғылыми-тәжірибелік орталығы ұйымдастырған педагогикалық олимпиадада І орынға ие болып, тәжірибелі мамандармен қатарлас тұрғанын көрсетті. Назарбаев Зияткерлік мектептері өткізген облыстық конференцияда сабақ зерттеу тәжірибесімен бөлісіп, Алғыс хатпен марапатталды. Сонымен бірге Республика күніне орай Ақтөбе облысы әкімінің орынбасарынан, сондай-ақ облыстық білім басқармасынан бірнеше мәрте Алғыс хаттар алып, еңбегі жоғары бағаланды.

«Jastar Alany» облыстық жас педагогтар кездесуіне қатысып, жас мамандар арасында белсенділік танытты. Сонымен қатар «Қазақстан педагогтарының тәжірибесі» атты ҮІІ өңірлік конференцияда зерттеу жұмысы негізінде баяндамасын ұсынып, арнайы Алғыс хатпен марапатталды.

Оқушылары да түрлі деңгейдегі білім сайыстары мен олимпиадалардың жеңімпаздары атанып келеді. Бұл – ұстаз еңбегінің нәтижесі.

Білімге құштар, шәкіртіне жанашыр, мамандығына адал Мадина Асқарова – болашағынан үлкен үміт күттіретін жас ұстаз. Осындай талапты да талантты жастар – еліміздің жарқын келешегінің кепілі.