ЖАС КЕЛСЕ - ІСКЕ

Қазіргі таңда қоғам алдында үлкен жауапкершілік жүгін арқалаған ұстаздар қауымының еңбегі өлшеусіз. Солардың қатарында жас болса да, өз ісіне адалдығымен, біліктілігімен және жаңашылдығымен ерекшеленіп жүрген ұстаз – Қыстаубаев Нұрмат Нариманұлы.

Қыстаубаев Нұрмат Нариманұлы – Ақтөбе облысы, Алға ауданы, Маржанбұлақ орта мектебінің дене шынықтыру пәнінің мұғалімі, педагог-сарапшы. Ол 2012–2017 жылдары Қ.Жұбанов атындағы Ақтөбе өңірлік мемлекеттік университетінде «Дене шынықтыру және спорт» мамандығы бойынша білім алып, 2017 жылдан бері туған мектебінде ұстаздық етуде.

Өз ісіне адал, жаңашыл әрі ізденімпаз маман ретінде Нұрмат Нариманұлы оқушылардың физикалық дамуына, салауатты өмір салтын қалыптастыруға, адамгершілік құндылықтарын бойларына сіңіруге ерекше көңіл бөледі. Сабақтарында инновациялық технологияларды тиімді пайдаланып, әр оқушының жас ерекшелігі мен мүмкіндіктерін ескеруді басты қағида санайды.

Ұстаздың шәкірттері аудандық, облыстық және республикалық деңгейдегі жарыстарда жоғары нәтижелерге қол жеткізіп жүр. Мәселен, волейболдан Жұмағазин Санжар – Қазақстан Республикасының екі дүркін чемпионы, спорт шеберлігіне үміткер. Ал «Шұбар доп» мектеп лигасында түрлі жас санатындағы қыздар командалары аудан, облыс деңгейінде жүлделі орындарға ие болды.

Қажырлы еңбегі мен жетістіктері еленіп, Нұрмат Нариманұлы 2023 жылы аудан әкімінің, білім бөлімі басшысының алғыс хаттарына ие болса, 2024 жылы облыстық дене шынықтыру және спорт басқармасы тарапынан марапатталды.

Қыстаубаев Нұрмат Нариманұлы – болашағынан үлкен үміт күттіретін педагог. Ол өз еңбегімен шәкірт жүрегінен орын алып қана қоймай, салауатты ұрпақ тәрбиелеуге сүбелі үлес қосып келеді. Алдағы уақытта да талмай ізденіп, талай белесті бағындыратынына сеніміміз мол.