ЖАС КЕЛСЕ – ІСКЕ
Жастар – ел ертеңінің алтын діңгегі. Бүгінгі қоғамның дамуы мен рухани жаңғыруы олардың ілім-білімге, өнерге, талап пен ізденіске деген құштарлығына байланысты. Осындай жігерлі де қабілетті жас мамандардың бірі – Тәжібай Ердәулет Нұрмұқанұлы.
Ердәулет Тәжібай ұлттық өнерді кәсіби деңгейде меңгеруге деген талпынысы оны 2016–2020 жылдары Алматы қаласындағы Құрманғазы атындағы Қазақ ұлттық консерваториясына жетеледі. Консерваторияны тәмамдаған жас маман 2020 жылдан бастап Темір ауданы Шұбарқұдық балалар музыка мектебіне домбыра пәнінің мұғалімі болып қабылданды.
Ұстаздың мектеп ішіндегі белсенділігі мен кәсібіне деген адалдығы түрлі байқаулардан көрініс тапты. 2023 жылы “Болашақ иесі – жас маман” сайысында бас жүлде иеленіп, 2024 жылы “Үздік жас маман – 2024” байқауында да бірінші орыннан көрінді. 2025 жылы да осы аталымда үздік деп танылып, үшінші рет қатарынан бас жүлдені иемденді.
Ердәулет Тәжібай кәсіби жетістіктерінің ішінде шәкірт тәрбиелеу бағытындағы табыстары ерекше орын алады. 2021 жылы XVIII республикалық “Ақкөгершін” байқауында дайындаған оқушысы жоғары нәтижеге жетіп, өзі “Үздік ұстаз” дипломымен марапатталды. Сол жылы “Талантты жастар” республикалық байқауында шәкірт баптағаны үшін “Үздік жетекші” атағын алды. 2022 жылы білім бөлімі тарапынан еңбегі бағаланып, алғыс хатпен марапатталды және облыстық педагогикалық олимпиадада бірінші дәрежелі диплом иеленді. 2024 жыл да Ердәулет Тәжібай үшін жемісті болды. Ұлттық домбыра күніне орай Темір аудандық мәдениет бөлімі тарапынан Алғыс хат берілді. Сонымен қатар “Біз Отанның ұланымыз” республикалық байқауына шәкірт дайындап, Алғыс хат алды.
Бүгінде Ердәулет Нұрмұқанұлы – ұлттық өнерді жас буынға жанашырлықпен жеткізіп, шәкірттің жүрегіне домбыраның қоңыр үнін сіңіріп жүрген талапты ұстаз. Жас келсе – іске дегендей, Ердәулет сияқты еңбекқор жастардың арқасында ұлттық өнердің көкжиегі кеңейіп, оның мәңгілік өміршеңдігіне деген сенім нығая түспек.