ЖАС КЕЛСЕ - ІСКЕ

Ұстаздық жол – білім мен жауапкершілікті, мейірім мен талапшылдықты қатар алып жүретін күрделі де қасиетті мамандық. Сол жолда адалдығымен, талпынысымен, үздіксіз ізденісімен көзге түсіп жүрген Ырғыз ауданындағы жас мамандардың бірі, орыс тілі мен әдебиеті пәнінің ұстазы Мейрамбек Ақниет Мейрамбекұлы.

Ақниет Мейрамбек 2015 жылы Ақтөбе гуманитарлық колледжіне оқуға түсіп, 2018 жылы ұстаздық жолға қадам басады. Сол жылдан бері Белшер негізгі орта мектебінде қызмет етіп келеді. Жас педагог сабақ үрдісіне үлкен жауапкершілікпен қарайды. Оның жаңашыл көзқарасы мен шығармашылыққа толы сабақтары балалардың пәнге деген қызығушылығын арттырып, білім сапасының көтерілуіне ықпал етіп келеді.

Ақниет Мейрамбекұлы аудандық «Мамандығым – мақтанышым» байқауында жүлделі ІІ орынға ие болып, республикалық «Өнегелі ұстаз – 2020» байқауында І орынды қанжығасына байлаған. Сонымен қатар аудандық «Ұстаздар – ұлы тұлғалар» және «Үздік сынып жетекші» байқауларында «Көрермендер көзайымы» номинацияларына ие болса, республикалық «Кемеңгер ұстаз» олимпиадасының да жеңімпазы атанған. Бұл марапаттар – жас маманның үздіксіз ізденісінің, өз ісіне адалдығы мен кәсіби шеберлігінің айқын дәлелі.

Ақниет Мейрамбекұлының бойындағы табандылық, ізденімпаздық пен жаңашылдық оның кәсіби жолын күн сайын биіктете түсуде. Ұстаздыққа деген шынайы ықыласы мен жауапкершілігі оны әріптестері мен оқушыларының құрметіне бөледі. Болашақта үлкен жетістіктерге жетіп, білім саласының дамуына өз үлесін қоса беретініне сенім зор.