ЖАС КЕЛСЕ - ІСКЕ

Білім беру кеңістігі үнемі жаңашылдық пен дамуды қажет етеді, ал осы өзгерістерді алға жетелейтін талапты да ізденімпаз жас мамандар. Солардың қатарында өз кәсібіне адалдық пен жаңашылдықты ұштастыра білген Ырғыз ауданы Ы.Алтынсарин атындағы жалпы білім беретін орта мектептің қазақ тілі мен әдебиеті пәні мұғалімі Жайман Мөлдір Нағымқызы бар.

Ақтөбе облысы Ырғыз ауданында

дүниеге келген Мөлдір Нағымқызы бала кезінен филология саласына қызығушылық танытып, 2013 жылы Орал қаласындағы М.Өтемісов атындағы Батыс Қазақстан мемлекеттік университетіне «Қазақ тілі мен әдебиеті» мамандығына оқуға түседі. Ол бұл жоғары оқу орнын абыроймен тәмамдап, алған білімін туған өңірінде ұрпақ тәрбиесіне арнауды жөн көреді.

Бүгінде еңбек өтілі жеті жылға жеткен жас маман Ы.Алтынсарин атындағы мектепте қазақ тілі мен әдебиеті пәнінен дәріс беріп, заманауи педагогикалық әдістерді тиімді қолданатын білікті ұстаз ретінде танылып жүр. Ол жасанды интеллект технологияларын оқыту үдерісіне орынды енгізіп, сабақ сапасын арттыруда тың тәсілдерге жүгінетін жаңашыл педагог.

Мөлдір Жайман кәсіби жетістіктері де назар аударарлық. Ол аудандық және облыстық олимпиадалардың жеңімпазы атанып, облыстық «Оқу және математикалық сауаттылық: табысты синергия» байқауында II орын иеленді. Сондай-ақ Ақтөбе облыстық білім және ғылым қызметкерлері кәсіподағы ұйымының білім саласындағы нәтижелі еңбегі үшін алғыс хатын алып, облыстық семинарларда тәжірибе бөліскені үшін бірнеше рет марапатталды.

Жас ұстаз оқушылардың тілдік және функционалдық сауаттылығын дамытуға ерекше мән береді. Сабақ барысында шығармашылық қабілетті өрістетуді, ойлау мәдениетін қалыптастыруды, көркем мәтінді терең талдай білу дағдыларын дамытуды басты мақсат етіп қояды. Осындай еңбекқорлығы мен ізденімпаздығы арқылы Мөлдір Нағымқызы бүгінгі білім беру үдерісінің жаңа талаптарына сай келетін, кәсіби шеберлігімен ерекшеленетін жас мамандардың жарқын үлгісі болып отыр.