ВНЕОЧЕРЕДНАЯ КОНФЕРЕНЦИЯ ЖАМБЫЛСКОЙ ОБЛАСТНОЙ ОРГАНИЗАЦИИ
Жамбыл облысы оқу-ағарту, ғылым және жоғары білім қызметкерлерінің жергілікті кәсіподағының кезектен тыс ХVІ Конференциясы өтті. Конференцияға Кәсіподақ филиалдары мен мүшелік ұйымдардан сайланған 128 делегат пен облыстық ұйым құрылтайшылығындағы шағын кәсіпорын басшылары, аппарат қызметкерлері мен мамандары қатысты. Алқалы жиынды Жергілікті кәсіподақ төрағасы Ерұлан Мағзымбеков ашып, жүргізіп отырды.
Күн тәртібіне қойылған алғашқы сұрақ – «Жергілікті кәсіподақтың Жарғысына өзгерістер мен толықтырулар енгізу туралы» хабарламаны Жергілікті кәсіподақтың құқықтық қызмет басшысы Әлия Джолшибекова баян етті. Келесі – «Жергілікті кәсіподақтың М.Х.Дулати атындағы Тараз университеті бастауыш кәсіподақ ұйымының мәртебесі туралы» сұрағы бойынша облыстық ұйым төрағасының орынбасары Жанболат Орынбеков хабарлама жасады. Аталған сұрақтарды қарап әрі талқылай келе Конференция облыстық ұйымның Жарғысы мен М.Х.Дулати атындағы Тараз университетінің бастауыш кәсіподақ ұйымының Ережесін жаңа редакцияда қабылдап, Әділет органында мемлекеттік тіркеуден өткізуді шешті.
Бұдан соң Тараз қаласының шекарасына Жамбыл және Байзақ аудандарының жер бөлігін қосу жолымен Тараз қаласының шекарасын кеңейтуге байланысты аталған территориялардағы білім беру мекемелері мен ұйымдары, сәйкесінше ондағы бастауыш кәсіподақ ұйымдары мәртебесіндегі мүшелік ұйымдардың бағыныстылығын өзгерту немесе ауыстыру туралы мәселе қаралды.
Бұдан бөлек Конференция делегаттары өздеріне Жарғымен берілген құзырет бойынша өкілетті басқару және атқарушы органдардың, бақылау-тексеру органдарының құрамын жасақтап, өзгерістерді бекітті. Атап айтқанда, Жергілікті кәсіподақтың Бақылау-тексеру комиссиясының құрамы, Пленум және Атқару комитетінің құрамынан әртүрлі себептерге байланысты өкілдер кері шақырылып, орнына өзге кәсіподақ мүшелері жолданды.
Конференция жұмысының соңында күн тәртібіндегі соңғы мәселе - «Білім қызметкерлері кәсіподағының Жамбыл аудандық комитеті» Филиалының кезектен тыс V сайлау конференциясын шақыру мәселесі қаралды.
Конференция қорытындысы бойынша барлық қаралған сұрақтар бойынша тиісті Қаулы қабылданып, олардың орындалуына бақылау жасау жөнінде тапсырмалар берілді.
Жергілікті кәсіподақ төрағасы Ерұлан Мағзымбеков Конференцияға қатысушыларға алғысын білдіріп, қабылданған шешімдердің кәсіподақ жұмысын оңтайландыруға, білім беру саласының дамуы мен қызметкерлердің құқықтарын қорғауға оң әсерін тигізетініне сенім білдірді.
Жамбыл облысы оқу-ағарту, ғылым және жоғары білім қызметкерлерінің жергілікті кәсіподағы.
