ҰЖЫМДЫҚ ШАРТ – ЕҢБЕК АДАМДАРЫНЫҢ МҮДДЕСІ ҮШІН ЖҰМЫС ІСТЕЙТІН ҚҰЖАТ
Жамбыл облысы оқу-ағарту, ғылым және жоғары білім қызметкерлерінің жергілікті кәсіподағының төрағасы Ерұлан Мағзымбеков «Қалық қалай, бастауыш ұйым?» жобасы аясында Қордай ауылындағы А.Байтұрсынов атындағы тірек мектебінің ұжымымен кездесті.
Кездесуді ашып, мектептің тыныс-тіршілігімен таныстырған мектеп директоры Мұхтар Байбеков ұжымда 140 адам еңбек ететінін, барлығы да кәсіподақ мүшесі екенін айтты. Өткен жылы аудандық кәсіподақ комитеті филиалы көмегіне 4 мекеме қызметкері жүгініп, құқықтық кеңес алған. Ал 3 адам туристік саяхатқа, 3 адам шипажайларға жолдама алса, тағы бірнеше адам Алакөл мен Ыстықкөл жағалауында демалған.
Кездесуде Жергілікті кәсіподақ төрағасы Ерұлан Мағзымбеков Ұжымдық шарт аясында облыстық білім басқармасымен әлеуметтік әріптестік аясында қол жеткізген шарттағы нормаларға тоқталды.
– Сіздердің жұмысқа кіргеннен бастап шыққанға дейінгі құқықтарыңыз Ұжымдық шарт арқылы реттеледі. Еңбек қатынасына байланысты нормалар да осында қамтылған. Мұнда келісілген талаптардың басым бөлігі орындалуда. Шарт тек педагогтер ғана емес, кіші қызметкерлердің де құқығын қорғайды. Ғимарат жөндеуші, электрик, аула сыпырушы, еден жуушы сауықтыру жәрдемақысын алып отыр ма? Міне, осының барлығына осы шартта көзделген нормалар арқылы қол жеткізілуде. Ұжымдық шарт – еңбек адамдарының мүддесі үшін жұмыс істейтін құжат, – деді Ерұлан Сәбенұлы.
Еркін форматта өткен жиында білім қызметкерлері қысылмай көкейіндегі сұрақтарын ашық қойып, пікір алмасты. Директордың орынбасары Мөлдір Мәкетай мұғалімдердің тірек мектебінде жүргізетін жанама пәні бойынша мұғалім санатының сақталуына байланысты сұрақ қойса, бастауыш сынып мұғалімі Ләззат Файзуллаева ақпан айында зейнеткерлікке шығатынын айтып, «Оқу жылы соңына дейін жұмыс істеуіме бола ма, санатым сақтала ма?» деген сауалын қойды. Орыс тілі мен әдебиеті пәнінің мұғалімі Әсел Жұмабаева вакансияда тұрған сағатты мұғалімдер арасында бөлу талабын жеңілдету қажеттігін көтерді. Бұдан басқа тірек мектебі статусына байланысты тағы басқа сұрақтарға Жергілікті кәсіподақ төрағасының орынбасары Жанболат Орынбеков құқықтық нормалар аясында жауап берді.
Жиын соңында белсенді бастауыш кәсіподақ ұйымының мүшелері марапатталды.
Жамбыл облыстық ұйымы
