ҰСТАЗДАР ҰЛТТЫҚ ОЙЫНДАРДАН СЫНҒА ТҮСТІ

Ақтөбенің Әйтеке би ауданында білім қызметкерлерінің қатысуымен дәстүрлі «Алтын сақа» аудандық турнирі ұйымдастырылды. Аталған шара Әйтеке би аудандық білім қызметкерлері кәсіподағы ұйымының қолдауымен өткізіліп, мұғалімдер арасында ұлттық ойындарды дәріптеу, салауатты өмір салтын насихаттау мақсатында ұйымдастырылды.

Жарысқа аудан мектептерінен 20 ерлер командасы және 14 әйелдер командасы қатысып, өзара бақ сынасты. Қатысушылар асық ату мен бес асық ойындарынан шеберліктерін көрсетіп, тартысты бәсекеге түсті.

Ерлер арасында өткен «Бес табан» (асық ату) сайысы бойынша І орынды Т.Г. Шевченко атындағы жалпы орта білім беретін мектеп командасы иеленді. ІІ орын Ж.Сәрсенов атындағы жалпы орта білім беретін мектеп командасына бұйырса, ІІІ орынды Абай атындағы жалпы орта білім беретін мектеп командасы қанжығасына байлады.

Әйелдер арасындағы «Бес асық» сайысы да тартысты өтті. Нәтижесінде І орынды Комсомол жалпы орта білім беретін мектебі, ІІ орынды Талдысай жалпы орта білім беретін мектебі, ал ІІІ орынды Әйке жалпы орта білім беретін мектебінің командалары жеңіп алды.

Турнир барысында ерекше көзге түскен ойыншылар да назардан тыс қалмады. «Үздік ойыншы» номинациясы бойынша «Бес табан» ойынында Т.Г.Шевченко атындағы жалпы орта білім беретін мектебінің мұғалімі Ғабит Бабанов, ал «Бес асық» сайысында Талдысай жалпы орта білім беретін мектебінің мұғалімі Гүлжанат Алмағанбетова марапатқа ие болды.

Жеңімпаздар мен жүлдегерлерге Білім бөлімі мен аудандық кәсіподақ ұйымының кубоктары, медальдары және мадақтама қағаздары табысталды. Сонымен қатар, ерекше көзге түскен екі жеңімпазға Түркістан қаласына тарихи-танымдық саяхатқа жолдама берілді.

Турнир мұғалімдер арасында ұлттық ойындарды кеңінен насихаттап қана қоймай, ұжымдық бірлікті нығайтып, салауатты өмір салтын дәріптеуге зор үлес қосты.