ҰСТАЗ ЖЕТІСТІГІ - ТӘРБИЕЛІ ШӘКІРТ
Қоғамның дамуы мен елдің болашағы – адал еңбегімен елге қызмет етіп жүрген еңбек адамдарының қолында. Солардың бірі – саналы ғұмырын ұрпақ тәрбиесіне арнаған, өз кәсібіне адал ұстаз Байтуғанова Света Базарбайқызы.
Ол 1969 жылы Қызылорда облысы, Жалағаш ауданының Ақсу совхозында дүниеге келген. Мәншүк Мәметова атындағы педагогикалық колледжін тәмамдаған соң еңбек жолын №19 санаторлық бөбекжай-бақшасында тәрбиеші болып бастап, бүгінгі күнге дейін осы білім ордасында үздіксіз қызмет атқарып келеді. Ұзақ жылдар бойы жас ұрпақтың бойына білім мен тәрбие нәрін сеуіп, өз ісіне деген жауапкершілігі мен кәсіби шеберлігінің арқасында әріптестері мен ата-аналардың зор құрметіне ие болды.
Еңбек адамының басты өлшемі – оның ісінің нәтижесі. Света Базарбайқызы тәрбиелеген бүлдіршіндер Абай және Мұқағали Мақатаев оқулары секілді шығармашылық байқауларда үздік нәтижелер көрсетіп, жүлделі орындарды иеленіп келеді. Сонымен қатар өзі де аудандық, облыстық және республикалық деңгейдегі кәсіби байқауларға белсене қатысып, педагогикалық шеберлігін дәлелдеп жүр.
Ерен еңбегінің жарқын көрінісі – ІІ республикалық «Пед Старт – 2025» байқауында «Үздік тәрбиеші» номинациясын жеңіп алуы. Сондай-ақ білім беру саласын дамытуға және кәсіподақ қызметіне қосқан сүбелі үлесі үшін Қазақстандық оқу-ағарту, ғылым және жоғары білім қызметкерлері салалық кәсіподағының «Кәсіподаққа сіңірген еңбегі үшін» төсбелгісімен марапатталды.
«Ұстаздың ең үлкен жетістігі – тәрбиелі шәкірт» деген ұстанымды өмірлік қағидасына айналдырған Света Базарбайқызы әр баланың бойындағы қабілетті ашып, оларды адамгершілікке, ізгілікке, білім мен өнерге баулып келеді. Жинақтаған мол тәжірибесін жас мамандармен бөлісіп, оларға бағыт-бағдар беруді де азаматтық парызы санайды.
Байтуғанова Света Базарбайқызының адал еңбегі – жас ұрпақтың жарқын болашағына қосылған баға жетпес үлес. Осындай өз ісіне берілген, маңдай терімен ел игілігіне қызмет етіп жүрген еңбек адамдары – қоғамның шынайы мақтанышы, кейінгі буынға үлгі болатын абзал жандар.
Қызылорда облыстық ұйымы