ҮЛГІ ТҰТАР ТҰЛҒА

Ақарыстан Ахатайұлы – ардагер ұстаз, білім саласының майталманы, «ҚР білім беру ісінің үздігі», «Кәсіподақ ардагері» төсбелгілерінің иегері, Жалағаш ауданының құрметті ардагері, Жаңаталап ауылы ардагерлер кеңесінің төрағасы.

Ол 1951 жылдың 23 наурызында дүниеге келген. Адамның қадір-қасиеті атақ-даңқымен емес, ел игілігі үшін атқарған адал еңбегімен өлшенеді. Ұзақ жылдар бойы мектеп қабырғасында табанды еңбек еткен Ақарыстан ағай білім беру ісінің дамуына сүбелі үлес қосып, талай шәкірттің саналы тәрбие мен сапалы білім алуына жол ашты.

Ұстаздық жолды өмірлік мұрат еткен ардақты жан өзінің кәсіби шеберлігімен, қарапайымдылығымен және адамгершілік қасиеттерімен әріптестері мен шәкірттерінің зор құрметіне бөленді. «ҚР білім беру ісінің үздігі», «Кәсіподақ ардагері» төсбелгілерінің иегері атануы – оның көп жылғы қажырлы еңбегінің лайықты бағасы.

Физика пәнінің мұғалімі Ақарыстан ағай — саналы ғұмырын білім саласына арнап, шәкірт тәрбиелеу жолында аянбай еңбек еткен қадірлі ұстаздардың бірі. Өз ісіне адал, білімге талапшыл ұстаз ретінде ол оқушыларына физика пәнінің қыр-сырын терең меңгертіп, ғылымға деген қызығушылықтарын оята білді. Сабақ барысында әр шәкірттің қабілетін танып, олардың білімге деген ынтасын арттыруға ерекше көңіл бөлді.

Ұстаздық жолында Ақарыстан ағай тек білім беріп қана қоймай, шәкірттеріне адамгершілік, еңбекқорлық, жауапкершілік секілді асыл қасиеттерді де сіңіре білді. Әріптестері арасында сабырлы мінезімен, парасаттылығымен және тәжірибесімен сый-құрметке ие болды. Оның тәлімін алған көптеген шәкірт өмірден өз орнын тауып, елге қызмет етіп жүрген азаматтарға айналды.

Бүгінде Ақарыстан ағай жас ұрпаққа өнеге болып, қоғамдық жұмыстарға белсене араласып келеді. Жаңаталап ауылы ардагерлер кеңесінің төрағасы ретінде ел бірлігі мен ұрпақ тәрбиесіне бағытталған игі бастамалардың ұйытқысы болып жүр. Оның ұстаздыққа деген адалдығы, шәкірттеріне деген қамқорлығы мен азаматтық ұстанымы көпшілікке үлгі болып қала береді.

Қызылорда облыстық ұйымы