ҰЛАҒАТТЫ ҰСТАЗҒА ҚҰРМЕТ

Бүгін “Білім-инновация” лицей-интернатында ұлағатты ұстаз, кәсіподақ мүшесі Батырғалиева Айгүлім Ғабитқызының зейнеткерлікке шығуына орай “Дара тұлға – сан ұрпақтың бағбаны” атты салтанатты кеш ұйымдастырылды. Бұл кеш саналы ғұмырын шәкірт тәрбиесіне арнаған ұстазға деген зор құрметтің белгісі болды.

Шарада Ақтөбе облыстық білім және ғылым қызметкерлері кәсіподағы ұйымының бас маманы Айжарық Серімбетов ізгі тілегін жеткізді. Кәсіподақ өкілі өз сөзінде Айгүлім Батырғалиеваның білім саласына қосқан сүбелі үлесін ерекше атап өтіп, ұстаз еңбегінің әрдайым жоғары бағаланатынын жеткізді.

Сонымен қатар, кәсіподақ өкілі ұйым төрағасының құттықтауын табыстап, “Білім және ғылым қызметкерлерінің кәсіподағына сіңірген еңбегі үшін” төсбелгісін салтанатты түрде табыс етті. Бұл марапат – ұстаздың көпжылдық адал еңбегі мен кәсіби біліктілігінің айқын көрінісі.

Айта кету керек, Айгүлім Батырғалиева – өз ісінің шебері, шәкірт жүрегінен орын алған білікті педагог. Ол “2021 жылдың үздік педагогы” атанып, сондай-ақ “Ақтөбе облысының құрметті ұстазы” атағына ие болған. Бұл жетістіктер – оның білім беру саласындағы қажырлы еңбегінің жемісі.

Кеш соңында әріптестері мен шәкірттері ұстазға деген ыстық ықыластарын білдіріп, алғыс пен құрметке толы лебіздерін арнады.