ҰЛАҒАТТЫ ҰСТАЗ

Қоғамның дамуы – білімді ұрпақтың қолында. Ал сол ұрпақты тәрбиелеп, білім нәрімен сусындататын ұстаздардың еңбегі орасан зор. Осындай жүрегі кең, еңбегі ерен жандардың бірі – Май орта мектебінің қазақ тілі мен әдебиеті пәнінің мұғалімі, әлеуметтік педагог Темирбулатова Асель Аманжоловна.

Асель Аманжоловна – өз ісіне адал, әр оқушының жүрегіне жол таба білетін білікті маман. Ол тек білім беріп қана қоймай, шәкірттерін адамгершілікке, жауапкершілікке, елін сүюге тәрбиелеп келеді. Сабақ барысында оқушылардың қызығушылығын арттырып, қазақ тілінің байлығын, әдебиеттің тереңдігін сезіндіре біледі.

            Әлеуметтік педагог ретінде де оның еңбегі ерекше. Асель Аманжоловна оқушылардың әлеуметтік жағдайына бейжай қарамай, олардың құқықтарын қорғап, қиын жағдайға тап болған балаларға қолдау көрсетеді. Ол ата-анамен, мектеп ұжымымен тығыз байланыс орнатып, әр баланың толыққанды дамуына жағдай жасайды.

Сонымен қатар Асель Аманжоловна кәсіподақ жұмысына да белсенді қатысуда.

            Ұстаздың басты ерекшелігі – мейірімділік пен талапшылдықты қатар ұштастыра білуінде. Асель Аманжоловна – тек әріптестері үшін ғана емес, жас ұстаздар мен оқушылар үшін де үлгі тұтар тұлға. Оның қажырлы еңбегі, кәсібіне деген сүйіспеншілігі – нағыз ұстазға тән қасиеттердің айқын көрінісі.

Осындай абзал жандардың еңбегі әрдайым бағаланып, құрметке ие бола берсін!

Ақжар ауданы

Солтүстік Қазақстан облысы