УАҚЫТ ӨЗГЕРІСІНЕ ІЛЕСКЕН КӘСІПОДАҚ КЕЛБЕТІ

Шығыс Қазақстан облысы, Өскемен қаласы бойынша білім бөлімінің «Оралхан Бөкей атындағы №44 лицейі» қалалық білім беру қызметкерлерінің кәсіподақ ұйымының өмірінде терең із қалдырған ерекше оқиға болды. Лицейдің кәсіподақ ұйымының көшбасшысы әрі қалалық білім беру қызметкерлері кәсіподағы жастар Кеңесінің төрағасы Қуаныш Бақытжанұлының ұйымдастыруымен лицейдің шығармашыл ұжымы «Жасанды интеллект – кәсіподақ қызметіндегі тиімді құрал» атты жастар кеңесінің отырысын өткізді.

Жастар кеңесінің отырысы қызу пікірталас алаңына айналды. Бір қарағанда, жасанды интеллект пен кәсіподақ жұмысы екі бөлек дүниедей көрінуі мүмкін. Алайда жастар Кеңесінің ұйымдастырушылары іс-шара барысында, нақтырақ айтқанда, шеберлік-сыныпта ұжымдық шартпен жұмыс істеу мысалы арқылы жасанды интеллектінің мүмкіндіктерін ашып көрсете білді. Жастар кеңесінің мүшелері қоғам өміріндегі жаңа құбылыстың қаншалықты пайдалы екеніне көз жеткізді. Олар жасанды интеллектінің көмегімен кәсіподақ мүшелерінің еңбек құқықтары мен әлеуметтік кепілдіктеріне қатысты сауалдарына жылдам жауап алуға болатынын түсінді.

Іс-шараға қатысушылар кәсіподаққа толықтай мүше болған педагогикалық ұжымның шығармашылық жұмыстарымен де танысты. Мектеп мұражайына саяхат, қатысушыларға арналған музыкалық сәлемдемелер көңілге шаттық ұялатты. Шығармашылық серпіліс үшін лицейдің педагог-психологтары ұжымдық жұмыста логика мен үйлесімділікті арттыруға бағытталған тренингтер өткізді.

Кеңес отырысының соңында Өскемен қалалық білім беру қызметкерлері кәсіподағы ұйымының төрағасы А.А.Кузнецов лицей директоры Ж.К.Назарбаеваға, жастар Кеңесінің төрағасы Қуаныш Бақытжанұлына, педагог-психологтар Ж.Е.Ерімбекова мен З.Р.Есенжароваға алғысын білдірді.

Бұл шара кәсіподақ ұйымы үшін жаңа мүмкіндіктерге жол ашып, оның заманауи талаптарға сай дамуына ықпал ететін маңызды қадам болды.

Шығыс Қазақстан облыстық ұйымы