ТЕКЕЛІДЕ ЕҢБЕК ЗАҢНАМАСЫ БОЙЫНША КӨШПЕЛІ СЕМИНАР ӨТТІ

Текелі қаласында Қазақстан Республикасының Еңбек кодексіндегі жұмыс берушінің міндеттеріне қатысты заң нормаларын түсіндіруге арналған көшпелі семинар ұйымдастырылды. Жиынды Қазақстан Республикасы Еңбек және халықты әлеуметтік қорғау министрлігі Мемлекеттік еңбек инспекциясы комитетінің Жетісу облысы бойынша департаменті, Оқу-ағарту, ғылым және жоғары білім қызметкерлерінің «Жетісу» жергілікті кәсіподағының қолдауымен өткізді.
Семинарға Текелі қаласының білім беру мекемелерінің басшылары мен орынбасарлары, есепшілері қатысты.
Жиынды облыстық кәсіподақ ұйымының төрағасы Мэлс Төлепбергенов ашып, шараның мақсатын айқындап, келген қонақтарды таныстырды.
Кездесуге қатысушыларға еңбек қатынастары, жұмыс берушінің еңбек қауіпсіздігін қамтамасыз етуі, әлеуметтік кепілдіктер мен еңбек шарттарын дұрыс жүргізу мәселелері бойынша жан-жақты түсіндірме берілді.
​Семинардың басты мақсаты — кәсіподақ мүшелерінің құқықтары мен мүдделерін қорғау, жұмыс жағдайын жақсарту және заң нормаларын тәжірибеде дұрыс қолдану. Шара барысында қатысушылар өздерін толғандырған сұрақтарға жауап алды.
Көшпелі семинарда Жетісу облысы бойынша Мемлекеттік еңбек инспекциясы департаментінің Еңбек қауіпсіздігін бақылау және еңбекті қорғау бөлімінің басшысы Даулетұлы Еркін, Текелі қалалық прокуратурасының прокуроры Нуриев Алмас Юлдашевич, Жетісу облысы бойынша Мемлекеттік еңбек инспекциясы департаментінің еңбек қатынастарын бақылау бөлімінің бас маманы Смағұлов Нариман Ақансеріұлы, Оқу-ағарту, бюджеттік ұйымдар, ғылым және жоғары білім қызметкерлері «Жетісу» жергілікті кәсіподағының заңгер-кеңесшісі Қайырхан Әсет баяндама жасады.

Кездесу барысында кәсіподақ мүшелеріне қысқаша есеп беріліп, саладағы өзекті мәселелер қозғалды. Түсіндіру жұмыстары мен пікір алмасу арқылы еңбек заңнамасының тиімді жүзеге асырылуына жағдай жасалды.
 
Жетісу облыстық кәсіподақ ұйымының баспасөз қызметі