ШӘКІРТ ТАҒДЫРЫНА БАҒЫТ БЕРГЕН ҰСТАЗ
Ләззат Біржанова №3 Байзақ колледжінде «Тамақтандыруды ұйымдастыру» мамандығының өндірістік оқыту шебері болып қызмет етеді. Оның мұнда жұмыс істеп келе жатқанына 13 жылдан асыпты.
– Мамандықтың жаманы жоқ. Абай атамыз «Жастықтың оты жалындап, жас жүректе жанған шақ. Талаптың аты арындап, әр қиянға салған шақ», – демекші, заман ағымына қарай кәсіптің түрі де көбейді. Студенттерге сабақ беру барысында үнемі «Сен нені қалайсың, мамандық атауы көп, бірақ өз жаныңа лайықты біреуін таңдау – міндетің» деп оларға айтып, бағыт-бағдар беріп отырамын. Студенттердің өзін тани білуге бағыт сілтеу біздің ұстаздық парызымыз. Мен өз пәнім арқылы студенттердің танымын өзгертіп, мамандықтың қыр-сырын терең танытып, ұғындыруға тырысамын. Мамандық арқылы адам өзін тәрбиелейтінін саналарына құйып, бұл өмірден өз орнын табуға септескім келеді. Алдымдағы жастар, студенттер мамандық таңдауда қателеспесе, өмірде өз орнын тапса деп тілеймін, – дейді Ләззат Сәбитқызы.
Оның шәкірттері бүгінде түрлі байқауларда топ жарып, жүлделі орындардан көрініп те жүр. Атап айтсақ, облыста ұйымдастырылған «Аспаздық ісі» құзіреттілігі бойынша Рахат Орынбай жүлделі ІІІ орынды, ал Нұрдос Құдайберген ІІ орынды иеленді. Ал өзі облыс деңгейіндегі аспаздық ісі бойынша өткізілген байқаулардың өткізуге үлес қосқаны үшін «Үздік тақырыптық жоспар – 2022» республикалық байқауында І дәрежелі дипломмен марапатталған еді. Одан басқа да алған марапаттары көп-ақ. Сондай-ақ, үнемі білімін түрлі курстарда жетілдіріп, студенттерге сапалы білім беруді өзінің міндеті санайды.
Жамбыл облыстық ұйымы.