САЗ ӨНЕРІНІҢ ШАМШЫРАҒЫ

Утеғалиева Нұрғаным Ермекқызы – Батыс Қазақстан облысы, Ақжайық ауданы, Тінәлі негізгі орта мектебінің музыка пәні мұғалімі. Ол тек білікті педагог қана емес, сонымен қатар ұлттық өнерді дәріптеуші, шебер қобызшы және аяулы әже.

Еңбек жолы және кәсіби біліктілігі

Нұрғаным Ермекқызы 1966 жылы 17 қарашада Ақжайық ауданы, Чапаев ауылында дүниеге келген. 1986 жылы Орал музыкалық училищесін бітіріп, Ілбішін ауылындағы музыка мектебінде қобыз сыныбының мұғалімі болып еңбек жолын бастады. 1994 жылдан бері Тінәлі жалпы білім беретін мектебінде музыка пәнінен дәріс беріп келеді.

Ол заманауи оқыту әдістерін меңгерген, «Өзін-өзі тану» пәні бойынша сертификатталған маман. Оның «Қазақтың би өнері» атты сабағы облыстық «Жайық ұстазы» газеті арқылы өңірге кеңінен таралған.

Әдістемелік ерекшелігі мен шығармашылығы

Ұстаздың негізгі тақырыбы: «Оқушылардың халықтық мұраға деген белсенділігін көтеріп, музыкаға қызығушылықтарын арттыру».

Нұрғаным Ермекқызының ұйымдастыруымен өткен айтулы шаралар:

- Ашық сабақтар: «Музыка бәйтерегі», «Дыбыстар әлемінде», «Дәстүрлі әншілік өнер».

- Музыкалық кештер: Ахмет Жұбанов пен Ескендір Хасанғалиевтің шығармашылығына арналған бағдарламалар.

- Тәрбиелік шаралар: «Үлгілі отбасы», «Қариялы ел – қазына», «Наурыз думан».

«Балдәурен» және шәкірттер жетістігі

Ұстаз тек сабақ беріп қана қоймай, «Домбыра – дастан» үйірмесіне жетекшілік етеді. Ол құрған «Балдәурен» домбырашылар ансамблі – мектептің мақтанышы.

-2009 жылы «Таланттар әлемі» аудандық байқауында І орын иеленді.

-Шәкірттерін көне өнер – терме айтуға баулиды.

Жолын қуған шәкірттері:

-А. Жанетмирова — №3 музыка мектебінің мұғалімі, облыстық Дәулеткерей атындағы оркестрдің қобызшысы.

-Ж. Құмаров, Г. Өміржанова, С. Қажғалиева — өнер және білім саласында жемісті еңбек етіп жүрген мамандар.

Марапаттары мен қоғамдық белсенділігі

Нұрғаным Ермекқызы — аудандық халықтық ұлт аспаптар оркестрінің прима қобызшысы.

1. «Үздік қосымша білім беру педагогы» сайысының ІІІ орын иегері (2009 ж.).

2. Б. Жұманиязов атындағы «Жазиралы кең дала» фестивалінің дипломанты.

3. Оқушылар арасындағы сауалнама бойынша: «Әділ бағалаушы ұстаз», «Жанашыр ұстаз» аталымдарының иесі.

«Өнер – ұлттың жаны. Ал сол өнерді бала жүрегіне ұялату – нағыз ұстаздық бақыт».

Г.Баймулдина,

Бастауыш кәсіподақ ұйымының төрайымы.

БҚО