ҚАЛЫҢ ҚАЛАЙ, БАСТАУЫШ ҰЙЫМ?

Кәсіподақ – ұжым тірегі.

Мен, Айгүл Жақыпбекқызы Сағындықова, 18 жылдан бері Алматы қаласының №95 мектеп-лицейінде қазақ тілі мен әдебиеті пәнінің мұғалімі болып еңбек етіп келемін. Осы уақыттың соңғы 9 жылын «Ұстаз» қалалық кәсіподағын қарасты бастауыш кәсіподақ ұйымының төрайымы қызметіне арнадым. Атқарылған жүйелі жұмыстың нәтижесінде 2025 жылы Алматы қалалық «Ұстаз» кәсіподақ ұйымы Алмалы аудандық филиалының «Үздік төрайымы» атағына ие болдым. Қалалық білім қызметкерлерінің кәсіподақ ұйымы осы еңбегімді жоғары бағалап, арнайы сертификатпен және Дубай қаласына саяхатпен марапаттады.

Кәсіби даму және құқықтық сауаттылық.

Мен өз қызметімде кәсіби шеберлікті шыңдауды басты орынға қоямын. Үнемі біліктілікті арттыру курстарынан өтіп, семинарлар мен конференцияларға белсене қатысамын. Әсіресе, еңбек заңнамасы бойынша өткізілетін консультациялар мен түсіндіру жұмыстары бастауыш ұйым қызметіне нақты серпін береді. Бұл білім бізге ұжымдағы әлеуметтік-еңбек құқықтарын қорғауға және ұжымдық шарттарды сапалы әзірлеуге мүмкіндік береді.

Еңбек қауіпсіздігі – басты назарда.

Кәсіподақ жұмысында мектептің техникалық инспекторы Муминова Айемқыз Тұрсыновнаның көмегі зор. Оның жетекшілігімен қызметкерлер мен оқушыларға арналған нұсқамалар жүйелі түрде жүргізіліп, қауіпсіздік техникасының сақталуы қатаң бақыланады. Профилактикалық іс-шаралардың дер кезінде ұйымдастырылуы – мектебіміздегі жайлы әрі қауіпсіз ортаның кепілі.

Бірлік бар жерде – нәтиже бар.

Аудандық кәсіподақ комитетінің үйлесімді әрі білікті жұмысының арқасында біз салалық жаңалықтардан қалыс қалмаймыз. Бұл маған кәсіподақ мүшелері арасындағы кез келген түсініспеушілікті жедел шешуге және еңбек құқықтарының бұзылуына жол бермеуге көмектеседі. Біздің басты мақсатымыз – әрбір ұстаздың мүддесін қорғап, олардың алаңсыз шығармашылықпен айналысуына жағдай жасау.

Айгүл Сағындықова, Алматы қаласы, «Ұстаз» кәсіподағы,

№95 мектеп-лицейінің бастауыш кәсіподақ ұйымының төрайымы.