ПРОФЕССОР – МЕКТЕП ҚОНАҒЫ

​«Өз елі ерлерін ескермесе, ел тегі қайдан алсын кемеңгерді», – деген Ілияс Жансүгіров. 22 қазан күні Атырау университетінде КСРО Халық мұғалімі, Атырау облысының Құрметті азаматы, Атырау университетінің Құрметті профессоры Құсиын Айтқалиевтың туғанына 95 жыл толуына орай республикалық ғылыми-тәжірибелік конференция өткізіледі.

Конференция жұмысы 4 бағытта жұмыс жасайды, қазірде еліміздің барлық жоғары оқу орындары мен білім беру ұйымдарындағы оқытушы-профессорлар, мұғалімдерден 200-ден астам ғылыми мақала түсті. Барлық авторларға сертификат және конференция жинағы жібірілетін болады.

Конференцияның басты қонағы – елімізге белгілі «абайтанушы», педагогика ғылымдарының докторы, Назарбаев университетінің профессоры Гүлтас Сайынқызы Құрманбай. Г.С. Құрманбай 20 қазан күні Махамбет ауданы Алға орта мектебінде болып, ұстаздармен және оқушылармен кездесті. Ашық, жарқын, естелікке толы жүздесуде Халық мұғалімі туралы әңгіме кеңінен айтылды. 5 сыныпқа арналған «Әдебиет» оқулығын дайындау, республикадағы Айтқалиев атындағы атаулы мектептің жұмысы сөз болды.

​Гүлтас Сайынқызы осы сапарында ағамыз жерленген қауымға арнайы барып құран бағыштады, селодағы тұрған үйінде болды. «Ұлылардың туған күні болады, өлген күні болмайды», – деген осы екен.​Ғалыммен бірге бұрынғы әріптестері Баршагүл Әубекирова, Жамиға Нағыметовалар болды. Профессор күн ертең әл-Фараби атындағы «BINOM SCHOOL» мектеп-лицейде Абайдың 180 жылдығы аясында облыстың барша қазақ тілі мен әдебиеті мұғалімдері алдында дәріс оқиды. Қатысамын деушілерге есік ашық.

Аталған шаралар «Атырау облысы білім және ғылым қызметкерлерінің кәсіптік одағы» ҚБ Оқу-ағарту министрлігінің «Ұстаздарға алғыс!» және Кәсіподақтар қозғалысының 120 жылдығы және Кәсіподақтар Федерациясының құрылғанына 35 жыл толуына орай «Тарихқа – тағзым, бүгінгіге – өзгеріс, болашаққа – сенім» атты айлық аясында өтіп жатыр.

Атырау облыстық ұйымы