ӨЗ ІСІНІҢ ШЕБЕРІ

Өнер мен еңбекті ұштастырып, өскелең ұрпаққа шығармашылықтың қыр-сырын үйретіп жүрген жандардың еңбегі – мәңгілік құрметке лайық. Осындай шәкірт тәрбиесіне жан-жүрегімен берілген ұстаздардың бірі – Шалқар ауданы №6 жалпы орта білім беретін мектебінің көркем еңбек пәнінің мұғалімі Қожахметова Гүлмира Сағынбайқызы.

Гүлмира Қожахметова білім беру саласында 28 жыл бойы үздіксіз еңбек етіп келе жатқан ол - өз ісіне адал, кәсібін жүрек қалауымен таңдап, шәкірттерінің шығармашылық қабілетін дамытуға бар күш-жігерін арнап жүрген білікті педагог.

1997 жылдан бері ұстаздық қызмет атқарып келе жатқан Гүлмира Қожахметова оқушыларға көркем еңбек пәнін оқытумен қатар, олардың бойында әсемдікке, еңбекке, өнерге деген сүйіспеншілікті қалыптастырып келеді. Ол сабақтарында зияткерлік және көркемдік әдістерді тиімді қолданып, заманауи технологияларды шебер меңгерткен тәжірибелі маман ретінде танылған.

Жоғары кәсіби шеберлігі мен шығармашылық ізденісінің нәтижесінде ол көптеген байқауларда жүлделі орындарға ие болды. 2021 жылы «Тәуелсіздік – тәу етер киелі ұғым» атты республикалық байқауда қолөнер жанры бойынша Бас жүлде, сол жылы өткен облыстық пәндік олимпиадада III орын иеленді. 2022 жылы «Біз Отанның ұланымыз» атты республикалық байқауда жеңімпаз болған оқушыны тәрбиелеп, жетекшілік еткені үшін Құрмет грамотасымен марапатталды. 2024 жылы Қазақстан Республикасының Оқу-ағарту министрлігінің Құрмет грамотасына, ал 2025 жылы халықаралық педагогикалық олимпиадада II дәрежелі, облыстық пәндік олимпиадада III дәрежелі дипломдарға ие болды.

Ұстаз еңбегінің жемісі – шәкірт жетістігі десек, Гүлмира Сағынбайқызының тәрбиелеген оқушылары да өнер мен қолөнер саласында өзін белсенді танытып келеді.

Қожахметова Гүлмира Сағынбайқызы – өз ісіне берілген, ұлағатты ұстаз, шығармашылықпен жұмыс істейтін нағыз өз ісінің шебері. Ол үшін ұстаздық тек кәсіп емес, өмірлік ұстаным мен жүрек қалауынан туған жауапты міндет.