ОЙЫЛДА ЖАС КӨШБАСШЫЛАРДЫҢ ОТЫРЫСЫ ӨТТІ

Ақтөбеде Ойыл аудандық білім қызметкерлері кәсіподақ ұйымының Жастар кеңесінің кезекті отырысы өтті. Жиынға ауданның білім беру ұйымдарында еңбек етіп жүрген белсенді, көшбасшы жас мамандары қатысып, өзара тәжірибе алмасу мен пікір бөлісудің тиімді алаңына айналды.

Кеңес барысында Жастар кеңесінің төрағасы Әбділда Сағынов ұйымның алдағы кезеңге арналған жұмыс жоспарымен таныстырып, жастар саясатын дамытуға бағытталған басым міндеттерді атап өтті. Сонымен қатар, ол жас мамандардың кәсіби және қоғамдық белсенділігін арттыру, жаңа жобаларды іске асыру және олардың әлеуетін қолдау бағытындағы бастамаларға тоқталды.

Шараға қатысқан аудандық кәсіподақ ұйымының төрағасы Гүлмира Избағамбетова мен бөлім басшысының міндетін атқарушы Гүлмира Садақбаева жас мамандардың бастамаларына қолдау білдіріп, олардың тың идеялары білім саласының дамуына серпін беретінін атап өтті. Сондай-ақ, олар жастардың ұйым жұмысына белсенді араласуының маңыздылығын ерекше жеткізді.

Кездесу барысында қатысушылар ашық диалог форматында өз ой-пікірлерін білдіріп, алдағы жобалар мен бірлескен іс-шараларға қатысты нақты ұсыныстарын ортаға салды. Жастар тарапынан кәсіби дамуға, тәжірибе алмасуға және әлеуметтік қолдауды күшейтуге бағытталған бірқатар бастамалар ұсынылды.

Жиын қорытындысында көтерілген ұсыныстарды жүйелі түрде жүзеге асыру қажеттігі атап өтіліп, қатысушылар алдағы уақытта бірлескен жұмысты жандандыруға және өзара ынтымақтастықты нығайтуға дайын екендіктерін білдірді.