МЕКТЕП БАСШЫСЫНЫҢ АБЫРОЙЛЫ ЖОЛЫ
Білім беру жүйесінің дамуы кәсібіне адал, ой-өрісі кең, басқарушылық мәдениеті жоғары тұлғалардың еңбегіне негізделеді. Осындай абыройлы көштің алдыңғы легінде келе жатқан жан – Басмағанбетова Рита Құрманғалиқызы. Ол өзінің білімі мен тәжірибесін ұрпақ тәрбиесіне, мектеп дамуына арнап, педагогика саласында өзіндік қолтаңба қалдырған беделді басшы.
Ақтөбе облысы Ырғыз ауданында дүниеге келген Рита Басмағанбетова 1988 жылы Қазақ Мемлекеттік қыздар педагогикалық институтын үздік бітіріп, бар ғұмырын ұстаздық жолға арнады. 40 жылға жуық еңбек жолында мұғалім, әдіскер, директордың орынбасары, аудандық әдістемелік кабинет меңгерушісі, мектеп директоры, Шалқар аудандық білім бөлімінің басшысы қызметтерін абыроймен атқарды. 2016 жылдан бері №8 жалпы орта білім беретін мектептің директоры ретінде оқу орнының дамуына жаңа серпін беріп, білім сапасын көтеруге бағытталған жүйелі жұмысты жолға қойып келеді.
Ізденімпаздығы мен жаңашылдығын дәлелдейтін марапаттары да аз емес: екі мәрте облыстық «Үздік мұғалім» атанды, ҚР Білім және ғылым министрлігінің, Ұлттық білім академиясының, облыс және аудан әкімдерінің Құрмет грамоталары мен Алғыс хаттарына ие болды. 2021 жылы «Жыл адамы» атанып, 2025 жылы Оқу-ағарту министрлігінің Құрмет грамотасымен марапатталды.
Басмағанбетова Рита Құрманғалиқызы – стратегиялық ойлайтын, ұжымды бір мақсатқа жұмылдыра алатын көреген басшы. Ол педагогтардың кәсіби өсуіне мүмкіндік жасап, мектептің даму бағытын жүйелі ұйымдастырып келеді. Әділдік пен талапшылдықты үйлестіре білетін басшы ретінде ұжымға да, ата-аналарға да, оқушыларға да сенім ұялатады.
2025 жыл – мектеп үшін ерекше белес болды. Рита Құрманғалиқызының жетекшілігімен оқу орны «Орта білім беретін үздік ұйым – 2025» атағын иеленіп, республикалық деңгейде үздік мектептердің қатарынан көрінді. Бұл жетістікпен бірге 12 миллион теңге көлеміндегі сыйақы да мектептің материалдық-техникалық базасын нығайтуға мүмкіндік берді. «Үздік мектеп – 2025» атағы – ұжымның кәсібилігі мен басқарудағы жүйеліліктің нақты көрінісі.
Рита Құрманғалиқызы – тәжірибелі ұстаз, шебер ұйымдастырушы, парасатты басшы. Ол үшін ең маңызды бағыт – сапалы білім, бәсекеге қабілетті шәкірт және кәсіби тұрғыда дамитын ұстаздар қауымы. Сондықтан да ол ұжым арасында үлкен құрметке ие. Осындай тұлға басқарған ұжымның да абыройы асқақ, болашағы нұрлы болмақ.