«КӨШБАСШЫЛЫҚ ЖӘНЕ ГЕНДЕРЛІК ТЕҢДІК: ЖАСТАРДЫҢ РӨЛІ»
Осындай тақырыпта кеше, 12 желтоқсан күні, Алматы қаласындағы Қазақ ұлттық қыздар педагогикалық университеті базасында Салалық кәсіподақтың ұйымдастыруымен республикалық семинар өткізілді.
Семинар жұмысына Қазақ ұлттық қыздар педагогикалық университеті ректоры Г.Қанай, Қазақстандық оқу-ағарту, ғылым және жоғары білім қызметкерлері салалық кәсіподағының Еңбекші әйелдер ісі жөніндегі Комиссия мүшелері қатысты.
Семинарды Университеттің Басқарма төрағасы - Ректор Қанай Гүлмира Әмірханқызы алғысөзімен ашып, университеттің жалпы жұмыс бағыты, әлеуметтік әріптестік аясында атқарылған шаралар туралы ақпарат берді.
- Кәсіподақ - университетте ұжым қызметкерлерінің еңбек құқығының бұзылмауын бақылайтын, қызметкерлерге әлеуметтік-экономикалық қолдау көрсететін қауқарлы ұйым,- деп атап өтті Гүлмира Қанай.
Университеттің профессор-оқытушылары түрлі бағыттарда өз баяндамаларымен бөлісіп, сөз сөйледі.
Салалық кәсіподақтың Орталық Комитет аппаратының құқықтық жұмыстар жөніндегі бөлім басшысы Р. Қыдырбаева Салалық кәсіподақтың Әйелдер ісі жөніндегі комиссиясының кезекті шарасы Қазақ ұлттық қыздар педагогикалық университетінде өткізіліп отырғаны тегін емес екенін тілге тиек етіп, семинар жұмысына сәттілік тіледі.
Шара қорытындысында Университеттің оқытушы-профессорлары ҚР Кәсіподақтар федерациясының, Салалық кәсіподақтың наградаларымен марапатталды.
Салалық кәсіподақ атынан семинардың Қазақ ұлттық қыздар педагогикалық университетінде ұйымдастырылуына қолдау көрсеткен ректор Гүлмира Әмірханқызына, университеттің Кәсіподақ көшбасшысы Ләззат Махайқызына алғыс білдіреміз.
