КЕЛІСУ КОМИССИЯСЫ ЖҰМЫСЫНА АРНАЛҒАН СЕМИНАР

Жамбыл облысында «Кәсіподақтың Жуалы аудандық филиалының келісу комиссиясының жұмыс тәжірибесі» тақырыбында облыстық семинар өтті. Жергілікті кәсіподақтың Жуалы аудандық комитеті ұйымдастырған іс-шараның негізгі мақсаты – келісу комиссияларының қызметін жетілдіру, еңбек дауларының алдын алу, құжаттаманы рәсімдеу тәртібі мен тиімді шешім қабылдау тәжірибесін арттыру болды.

Семинарға Жергілікті кәсіподақтың Тараз қалалық және аудандық филиал төрағалары, құқықтық инспекторлар, аппарат қызметкерлері мен Жуалы аудандық Келісу комиссиясының мүшелері, білім беру мекемелерінің басшылары мен бастауыш кәсіподақ ұйымының жетекшілері қатысты.

Семинар қатысушыларын Кәсіподақтың Жуалы аудандық комитетінің төрағасы Мәжит Айжанов құттықтап, еңбек дауларын бейбіт жолмен шешудегі келісу комиссияларының маңызына тоқталды.

Ал аудандық құқықтық инспектор Гүлжан Орымбаева келісу комиссияларының жұмыс процесіндегі өзекті мәселелер мен құжаттарын рәсімдеу талаптары бойынша баяндама жасады. Мұнан соң Жуалы ауданының білім бөлімінің келісу комиссиясының мүшелері - білім бөлімінің әдістемелік кабинетінің меңгерушісі Ерназар Жүзбаев, М.Жұмабаев атындағы №29 орта мектептің мұғалімі Ақмарал Оразалиева, Көктөбе орта мектебінің мұғалімі Несібелі Исламова өз тәжірибелерінен мысалдар келтіріп, еңбек дауларын сотқа дейін шешудің маңыздылығын жеткізді.

Топтық жұмыстарда қатысушыларға «миға шабуыл» әдісі арқылы еңбек дауларына қатысты жағдаяттар ұсынылған болса, тәжірибелі заңгерлер мен кәсіподақ жетекшілері қатысушыларға еңбек дауларын шешудің әдістерін, келіссөз жүргізудің тиімді тәсілдерін үйретті. Әсіресе, еңбек заңнамасындағы өзгерістер мен олардың келісу комиссияларының жұмысына әсері туралы сұрақтар қызу талқыланды.

Семинар барысында іс-шара өтіп жатқан Ш.Мұртаза атындағы №1 мектеп-гимназияның педагог-психологы Мира Ускенбаева қатысушыларға арналған психологиялық сергіту сәті мен тренинг өткізді.

Жиынды қорытындылаған Жергілікті кәсіподақ төрағасы Ерұлан Мағзымбеков семинардың мазмұнды өткенін атап өтіп, қатысушылардың белсенділігін де жоғары бағалады.

- Еңбек дауларын шешу бойынша кәсіподақ мүшелерінің сапалы білім алуы өте маңызды. Бүгінгі семинардан әрбір қатысушы қажетті тәжірибе жинақтап, пайдалы ақпаратпен қаруланды деп білемін. Еңбек дауы кез-келген ұйымда кез-келген уақытта орын алуы мүмкін. Сол үшін біз оған дайын болу керекпіз. Ал еңбек дауын болдырмау үшін әлеуметтік әріптестермен бірлескен іс-шараларды күшейтіп, осындай оқуларды тұрақты ұйымдастыру қажет, - деді Ерұлан Сәбенұлы.

Іс-шара соңында сұрақ-жауап сағаты өтіп, кері байланыс алу мақсатында сауалнама жүргізілді.

Жамбыл облыстық ұйымы