КӘСІПОДАҚ ҰЖЫМДАҒЫ ҚҰҚЫҚТЫҚ САУАТТЫЛЫҚТЫ АРТТЫРУДА

15 мамырда Павлодар облысы Ертіс ауданының №4 Ертіс жалпы орта білім беру мектебінің базасында Қазақстандық оқу-ағарту, ғылым және жоғары білім қызметкерлері кәсіптік одағының Павлодар облыстық ұйымы Ертіс ауданының келісу комиссиялары мүшелеріне арналған оқыту семинарын өткізді.

Еңбек ұжымының алдына қойылған мақсаттар мен міндеттерге қол жеткізудегі ең маңызды фактор – ұжымдағы тұрақты психоэмоционалдық ахуал. Келісу комиссиясы мүшелерін оқыту – құқықтық сауаттылық пен ұжымдағы тұрақтылықтың кепілі. Кез келген ұйымда жұмыстың табысты аяқталуы көбіне ұжымдағы жағымды атмосфера мен туындаған мәселелерді сындарлы түрде шеше білуге байланысты. Қызметкерлер мен жұмыс берушінің құқықтарын қорғап, тепе-теңдікті сақтаудың маңызды құралы – келісу комиссиясы.

Іс-шараның мақсаты – келісу комиссиясын формалды органнан мектеп пен қызметкердің мүддесін қорғайтын нақты әрекет етуші тетікке айналдыруды үйрету.

Павлодар облыстық ұйымының төрайымы Гүлбарам Науразбаева келісу комиссиялары қызметінің маңыздылығына тоқталып, даулы мәселелерді қарастыру тәжірибесінен нақты мысалдар келтірді. Семинар жұмысына білім бөлімінің басшысы Айнұр Сәрсенова да қатысты.

Ұйымның құқықтық мәселелер жөніндегі бас маманы Гүлшат Жаркенованың мазмұнды баяндамасы қатысушыларды бірден іскерлік форматтағы жұмысқа бағыттады.

Оқыту бағдарламасы тәжірибеге барынша бағытталып, еңбек заңнамасының ең өзекті аспектілерін қамтыды:

Құқықтық негіздер мен регламент: келісу комиссиясын құру және оның жұмысын ұйымдастыру тәртібін реттейтін ҚР Еңбек кодексінің нормаларын жан-жақты қарастыру;

Дауларды қарау рәсімі: қызметкердің өтінішін қабылдаудан бастап, дәлелдерді жинау, заңды шешім шығару және оны рәсімдеуге дейінгі кезеңдерді кезең-кезеңімен талдау;

Қақтығыс психологиясы және медиация: қатысушылар келіссөз жүргізу, күйзеліс жағдайында эмоцияларды басқару және екі тарапты да қанағаттандыратын ымыралы шешімдер табу дағдыларын жетілдірді.

Семинарда практикалық бөлімге ерекше назар аударылды. Қатысушылар еңбек тәжірибесіндегі нақты кейстерді талдап, құқық бұзушылықтарды дұрыс саралауды және хаттамаларды сауатты рәсімдеуді үйренді.

Оқыту белсенді диалог форматында өтті. Комиссия мүшелері теориялық біліммен қатар ұйым ішіндегі еңбек дауларын сотқа жеткізбей жедел әрі объективті шешуге арналған нақты іс-әрекет алгоритмдерін меңгерді.

Павлодар облыстық ұйымы