ІЗДЕНІМПАЗ ҰСТАЗДЫҢ БИІК БЕЛЕСІ

Ержанғалиева Гүлайым Ұзақбайқызы – кәсіби шеберлігімен танылған білікті педагог, білім беру саласында ұзақ жылдар бойы табанды еңбек етіп келе жатқан тәжірибелі маман. 2006 жылдан бастап Ақтөбе сервис колледжінде «Тігін өндірісі және киімді үлгілеу» мамандығы бойынша өндірістік оқыту шебері қызметін атқарып, кейіннен арнайы пән оқытушысы ретінде өз жұмысын жалғастырып келеді. Жалпы еңбек өтілі – 19 жыл.

Уақыт талабына сай кәсіби дамуды басты мақсат еткен ұстаз 2022 жылдан бастап өндірістік қажеттілікке байланысты арнайы пән оқытушылығына ауысып, студенттерге теориялық және практикалық білім беруді жүйелі түрде жүзеге асыруда. Оның сабақ беру әдістемесі тәжірибеге негізделген, нақты өндірістік талаптармен ұштасқан.

Еңбек жолында Гүлайым Ержанғалиева тек оқу үдерісімен шектелмей, колледжішілік, қалалық және облыстық деңгейдегі түрлі кәсіби байқауларға белсенді қатысып, білім беру ұйымының абыройын арттыруға өз үлесін қосып келеді. Оның шәкірттері де бірнеше рет жүлделі орындарға ие болып, ұстаз еңбегінің нәтижелілігін дәлелдеген.

Жуырда Шымкент қаласында «Сән технологиясы» бағыты бойынша техникалық және кәсіптік білім беру (ТжКБ) педагогтарына арналған республикалық кәсіби шеберлік байқау өтті. Бұл байқау педагогтардың кәсіби деңгейін арттыруға, тәжірибе алмасуға және сала дамуына серпін беруге бағытталған маңызды алаң болды.

Еліміздің әр өңірінен жиналған 12 үздік қатысушының арасында Ақтөбе сервис колледжінің оқытушысы, кәсіподақ мүшесі Ержанғалиева Гүлайым Ұзақбайқызы жоғары деңгейде өнер көрсетіп, жүлделі «Үздік маман» медальонының иегері атанды.

Бұл жетістік – оның көпжылдық еңбегінің, кәсіби ізденісінің және үздіксіз дамуға деген ұмтылысының нәтижесі. Сонымен қатар, бұл марапат Ақтөбе өңіріндегі техникалық және кәсіптік білім беру саласының кәсіби деңгейін айқындайтын маңызды көрсеткіш болып табылады.