«HARD SKILLS FEST» ОБЛЫСТЫҚ ЖАСТАР ФОРУМЫ

Жұмысшы мамандықтар жылы аясында С.Аманжолов атындағы Шығыс Қазақстан университетінің қабырғасында «HARD SKILLS FEST» облыстық жастар форумы өтті. Бұл – жастардың жалынды жігерін жаңа биіктерге жетелеуге арналған айтулы шара!

Форумның түпкі мақсаты – жастардың жүрегінде жұмысшы және техникалық мамандықтарға деген құрмет сезімін ояту, экономиканың нақты секторындағы сұранысқа ие кәсіптердің абыройын асқақтату, сондай-ақ өңір жастарының кәсіби бағдар алуына, өз қабілеттерін шыңдауына және еңбек нарығында өз орнын табуына жол ашу.

Шараны С.Аманжолов атындағы ШҚУ ректоры Мұхтар Төлеген қонақтарды, колледж директорлары мен студенттерді жүрекжарды құттықтау сөзімен ашты.

Форумға қатысқан Шығыс Қазақстан облысы оқу-ағарту, жоғары білім, ғылым және басқа бюджеттік ұйымдар қызметкерлерінің жергілікті кәсіподағының төрағасы Назгүл Қасенова өз баяндамасында: «Облыстық кәсіподақ ұйымының жанындағы Жастар кеңесі аудандық, қалалық кәсіподақ ұйымдарының өкілдерін біріктіріп, жастар – әрқашан жаңа идеялардың, сарқылмас жігердің және кез келген мәселеге тың көзқарастың бастауы болып табылатынын» атап өтті.

Ол сондай-ақ, «Жастардың ұйымдастыруымен семинарлар, түрлі акциялар мен жастар форумдары тұрақты түрде өткізіліп, жастардың бастамаларын қолдау, оларды шешім қабылдау үдерісіне тарту, оқыту және өзін-өзі дамытуға жағдай жасау – біз үшін аса маңызды» екенін жеткізді. Назгуль Касенова кәсіподақ тарапынан қажетті ұйымдастырушылық, әдістемелік және қаржылық қолдау көрсетуге әзір екендіктерін білдірді.

Сөз алған қонақтар жұмысшы мамандықтарының жастар арасындағы мәртебесін арттырудың маңыздылығына тоқталды.

Форум аясында жастардың білімін шыңдауға арналған шеберлік сабақтары мен тренингтер ұйымдастырылды.

Шығыс Қазақстан облыстық ұйымы