ЕҢБЕКПЕН ӨРІЛГЕН ҰСТАЗДЫҚ ЖОЛ

Тараз қаласындағы №4 орта мектептің технология пәні мұғалімі Махмуд Исабекович Каримбоев ұстаздық жолда ұзақ жыл еңбек етіп келе жатқан тәжірибелі педагогтардың бірі. Ол еңбек жолын 1986 жылы бастап, бүгінге дейін білім беру саласында үздіксіз қызмет етіп келеді. Жалпы еңбек өтілі – 39 жыл болса, соның 21 жылын осы мектепте өткізген. Осы уақыт аралығында талай шәкірт тәрбиелеп, әріптестерінің құрметіне бөленіп үлгерді.

Махмуд Исабекович сабағын қарапайым әрі түсінікті жеткізуге тырысады. Теорияны тәжірибемен ұштастырып, оқушылардың қызығушылығын оятуға мән береді. Оның жетекшілігімен оқушылар түрлі байқауларға қатысып, жүлделі орындар алып жүр. Атап айтқанда, «Тараз – менің сүйікті қалам», «Елбасы – ел тірегі» сияқты қалалық байқауларда, сондай-ақ, архитектуралық макеттер бойынша жарыстарда жақсы нәтижелер көрсеткен.

Ұстаз ретінде ғана емес, адам ретінде де ол кішіпейіл, сабырлы, өз ісіне жауапкершілікпен қарайтын жан. Әріптестері оны сенімді, ісіне ұқыпты маман ретінде бағалайды. Ұзақ жылғы еңбегі елеусіз қалған жоқ. Ол қалалық білім бөлімі тарапынан Құрмет грамоталарымен және түрлі деңгейдегі марапаттармен наградталған.

Махмуд Исабекович отбасында ардақты әке, немерелеріне қамқор ата. Жұмысы мен отбасы арасындағы тепе-теңдікті сақтай білген жан. Сонымен бірге, ол әр шәкіртінің бойындағы қабілетті байқап, оны дамытуға ерекше көңіл бөледі. Оқушылармен тіл табыса білуі оның ұстаз ретіндегі басты артықшылықтарының бірі. Көп жылдық тәжірибесі арқылы ол тек білім беріп қана қоймай, өмірлік бағыт-бағдар да көрсетіп келеді. Осындай қарапайымдылығы мен жауапкершілігінің арқасында шәкірттері оны әрдайым құрмет тұтады. Ұстаз еңбегі көзге көрінбегенімен, оның нәтижесі уақыт өткен сайын айқын сезіледі.

Осындай ұстаздардың еңбегі қоғам үшін маңызды. Олар үнсіз еңбек етіп, ел болашағын тәрбиелеп келеді. Махмуд Исабековичтің өмір жолы соның бір дәлелі.

Жамбыл облыстық ұйымы