ЕҢБЕК АДАМЫ

Мұғалім болу жай ғана мамандық емес, бұл үлкен жауапкершілік пен жан тазалығын талап ететін қасиетті қызмет. Осы игі істің шынайы үлгісін көрсетіп келе жатқан жанның бірі – Ақтөбе облысы, Шалқар қаласындағы №8 жалпы орта білім беретін мектеп-гимназиясының математика пәні мұғалімі Мұхтарова Света Кеңесқызы.

Света Кеңесқызы ұстаздық жолын Ырғыз ауданындағы Нарқызыл мектебінде бастаған. Кейін Шалқар қаласындағы №3 орта мектебінде, ал 2011 жылдан бері қазіргі қызмет орнында табанды еңбек етіп келеді.

37 жылдық ұстаздық жолында Света Мұхтарова сансыз шәкірттің білім мен өмір жолына бағыт-бағдар беріп, олардың бойына жауапкершілік пен еңбекқорлықты дарыта білді. Оның әр сабағы терең дайындықпен, оқушының жас ерекшелігі мен қабілетіне сай жүргізіледі. Ұстаз есеп шығаруды ғана емес, оқушыны өзіне сенуге, ой еркін жеткізуге, дұрыс шешім қабылдауға үйретеді.

Мұғалімнің шәкірттері жыл сайын пәндік олимпиадалар мен білім сайыстарында жүлделі орындарға ие болып, жоғары оқу орындарына жол тартып келеді. Бүгінде олардың көпшілігі түрлі салада еңбек етіп, ел дамуына өз үлесін қосуда. Бұл – ұстаз еңбегінің айқын жемісі.

Ұстаздың тынымсыз еңбегі елеусіз қалған емес. Ол Ақтөбе облысының білім басқармасының және ҚР Оқу-ағарту министрлігінің Құрмет грамоталарымен, сондай-ақ «Ұлағатты ұстаз» төсбелгісімен марапатталған. 2020 жылы «Шәкірт жүрегіне жол тапқан ұстаз» атты республикалық жинаққа енген.

Мұхтарова Света Кеңесқызы – нағыз еңбек адамы, өз мамандығына адал, шәкірт жүрегіне жол таба білген ұлағатты ұстаз. Оның өнегелі өмірі мен қажырлы еңбегі жас мұғалімдерге үлгі, ұлт болашағына бағыт берер шырақ.