ЕҢБЕК АДАМЫ

Ұстаздық мамандығын абыроймен атқарып келе жатқан жандардың бірі – Ырғыз ауданындағы тәжірибелі мұғалім, педагог–зерттеуші Махаева Зәуреш Жәрдемқызы.

Ұстаздық жолын Ырғыз орыс орта мектебінен бастаған Зәуреш Жәрдемқызы кейін №1 қазақ орта мектебінде, Ырғыз гимназиясында қызмет атқарып, мол тәжірибе жинады. 2014–2019 жылдары Шалқар қаласындағы №8 жалпы орта білім беретін мектепте директордың оқу ісі жөніндегі орынбасары қызметін атқарды. Ал 2019–2021 жылдары Ырғыз гимназиясының директоры әрі гимназия жанындағы интернат меңгерушісі қызметін абыроймен атқарды. Әр кезеңде ол ұйымдастырушылық қабілетімен, жауапкершілігімен және адами қасиетімен танылды.

Педагог-зерттеуші ретінде Зәуреш Махаеваның еңбегі шәкірт жетістіктері арқылы да айқын көрінеді. Ол дайындаған оқушылар жыл сайын аудандық, облыстық пәндік олимпиадаларда, ғылыми жобаларда, түрлі шығармашылық сайыстарда жүлделі орындарға ие болып жүр. Әдебиет пен өнерге баулудағы еңбегі үшін талай мәрте аудандық және облыстық деңгейде марапатталды.

Ізденімпаз ұстаздың қаламынан шыққан әдістемелік еңбектер де кең таралған. Ол 5–11 сыныптарға арналған диктанттар жинағын, «Оқу үдерісінде қазақ тілі мен әдебиеті пәнінде шығармашылық пен ізденісті шыңдау стратегиясы» атты әдістемелік құралды, «Үздік қысқа мерзімді жоспарлар» жинағын, «Мектеп жанындағы интернат құжаттарының жинақталуы» әдістемелік құралын, сондай-ақ «Мәтіндік талдау тапсырмалары» авторлық бағдарламасын жасақтап, облыс көлеміне ұсынды. Бұл еңбектер мұғалімдер қауымы арасында кеңінен қолданыс тапқан.

Кәсіби шеберлігін арттырудан жалықпайтын Зәуреш Махаева әрдайым шығармашылық ізденісте жүретін педагог. Ол қатысқан кәсіби байқаулардың көбінде жүлделі орын алып, іс-тәжірибесі аудандық және облыстық деңгейде тұрақты түрде таратылып келеді. Жалықпай ізденіп, еңбек етудің жемісі ретінде 2024 жылы ҚР Оқу-ағарту министрлігінің Құрмет грамотасымен марапатталуы Зәуреш Жәрдемқызының ұстаздық жолындағы ең жоғары жетістіктерінің бірі.

Махаева Зәуреш Жәрдемқызы – тек өз ісінің шебері ғана емес, білім саласына адал қызмет етіп келе жатқан, ұрпақ тәрбиесіне шын жүректен үлес қосқан еңбек адамы. Оның өнегелі жолы – жас ұстаздарға үлгі, шәкірттеріне бағдар, қоғамға құнды еңбек.