ЕҢБЕК АДАМЫ

Қоғамның дамуы мен ұлт болашағының баянды болуы ең алдымен өз ісіне адал, жауапкершілігі жоғары еңбек адамдарының тынымсыз еңбегіне тікелей байланысты. Әсіресе, ұрпақ тәрбиесімен айналысатын ұстаздардың еңбегі қашанда ерекше құрметке лайық. Осындай абыройлы да жауапты міндетті адал атқарып жүрген білікті мамандардың бірі – Ырғыз ауданы Қарақұдық негізгі орта мектебінің тәжірибелі педагогы Түгелов Болатбек Мырзағұлұлы.

Түгелов Болатбек Мырзағұлұлы Қарақұдық негізгі орта мектебінде көркем еңбек пәнінен сабақ беріп, жас ұрпақтың шығармашылық қабілетін дамытуға сүбелі үлес қосып келеді. Ол ұстаздықты өмірлік мұрат еткен, кәсіби білімі мен тәжірибесін шәкірт тәрбиесіне арнаған жан. Еңбек жолының әр кезеңінде өз білімін үнемі жетілдіріп, заманауи әдіс-тәсілдерді тиімді қолдана отырып, оқушылардың зияткерлік және шығармашылық әлеуетін дамытуға баса назар аударады. Ұстаздың сабағы – тәрбие мен білімнің үйлесім тапқан жарқын үлгісі.

Еңбектің еленуі – мәртебе. Ұстаздың тынымсыз еңбегі мен кәсіби шеберлігі жоғары деңгейде бағаланып келеді. Атап айтқанда, 2021 жылы білім саласына қосқан үлесі үшін Ақтөбе облысы әкімінің Алғыс хатымен марапатталды. Сондай-ақ, 2024 жылы «Шығармашылық ойлау мен зияткерлік дамудың негізгі өнер» тақырыбында облыстық ассоциация аясында өз тәжірибесін үздік көрсеткені үшін Алғыс хатқа ие болды. Республикалық «Инновация» баспа үйі тарапынан берілген Алғыс хат та оның еңбегінің айқын дәлелі.

Ұстаздық – Түгеловтер әулетіне тән асыл дәстүр. Бұл өнегелі жолды Болатбек Мырзағұлұлы абыроймен жалғастырып қана қоймай, отбасында да шәкірт тәрбиесіне деген сүйіспеншілікті үлгі етіп келеді. Жұбайы Сәнім Санымбаева да ұстаздықты өмірлік серік еткен аяулы жан. Екеуінің өмір жолы ұрпақтан ұрпаққа жалғасқан ұстаздық дәстүрдің жарқын көрінісі. Бүгінде бұл игі жолды олардың ұлы Сұлтан Болатбек жалғастырып, жас ұстаз ретінде шәкірт жүрегіне жол табуда.

Өз ісіне адал, ұрпақ болашағына жауапкершілікпен қарайтын Түгелов Болатбек Мырзағұлұлы сынды ұстаздар қоғамның шынайы мақтанышы. Оның өнегелі еңбегі мен өмір жолы жас мамандарға үлгі, ал шәкірттері үшін биік адамгершіліктің мектебі болып қала бермек.