ЕҢБЕК АДАМЫ

Ұстаз – тек білім беруші ғана емес, ол бағыт-бағдар көрсетуші, шәкірт жүрегіне жол таба білетін тәрбиеші, рухани шамшырақ. Осындай қадірлі мамандық иелерінің бірі – Бурхина Сәуле Әбдіғалиқызы.

Бурхина Сәуле Әбдіғалиқызы - Ақтөбе облысы Ырғыз ауданының тумасы. Мектеп қабырғасында жүріп-ақ білімге деген құштарлығы мен ұстаздыққа деген ынтасы айқын байқалған ол Северный орта мектебін сәтті тәмамдайды. Арман қуған жас талапкер 1982–1986 жылдары Алматы қаласындағы Абай атындағы педагогикалық институттың филология факультетінде білім алып, қазақ тілі мен әдебиеті пәнінің мұғалімі мамандығын игереді.

Еңбек жолын Бекенбай орталау мектебінен бастаған жас ұстаз аз уақыттың ішінде өзінің жауапкершілігімен, ізденімпаздығымен ерекшелене білді. 1990 жылдан бастап Жаңажол орта мектебінде ұзақ жылдар бойы қазақ тілі мен әдебиеті пәнінен дәріс беріп, талай шәкірттің жүрегіне жол тапты. Ал 2007–2008 оқу жылынан бастап Байғанин ауданының №2 Қарауылкелді орта мектебінде ұстаздық қызметін жалғастырып, өз тәжірибесін кейінгі буынмен бөлісіп келеді.

Бурхина Сәуле Әбдіғалиқызы – 40 жылға жуық уақытын білім саласына арнаған, өз ісіне адал, білікті де тәжірибелі ұстаз. Бұл – тек еңбек өтілі ғана емес, мамандығына деген шынайы сүйіспеншілік пен қажырлы еңбектің айғағы. Ол әрбір шәкіртіне тек білім беріп қана қоймай, олардың бойына адамгершілік қасиеттерді сіңіріп, өмірде өз жолын табуына бағыт-бағдар береді.

Ұстаз еңбегінің ең үлкен жемісі – шәкірт жетістігі. Осы орайда Сәуле Бурхина тәрбиелеген талай оқушы өмірден өз орнын тауып, түрлі салада табысты еңбек етуде. Бұл – ұстаз еңбегінің еленуі мен бағалануының нақты көрінісі.

Бурхина Сәуле Әбдіғалиқызы – саналы ғұмырын жас ұрпаққа білім мен тәрбие беруге арнаған, өмірлік тәжірибесі мол, өнегелі жан. Осындай еңбек адамдары қоғамның тірегі, елдің болашағын қалыптастыратын асыл жандар.