ЕҢБЕК АДАМЫ
Ұстаз – ұлт болашағын тәрбиелейтін, білім мен тәрбие арқылы қоғамның дамуына үлес қосатын ұлы тұлға. Осындай жауапты жолды абыроймен атқарып келе жатқан жандардың бірі – тәжірибелі педагог Бижанова Салтанат Махатқызы.
Ойылдық ұстаз Салтанат Бижанова — 1965 жылы 29 сәуірде дүниеге келген. 1989 жылы Алматы қаласындағы Абай атындағы қазақ педагогикалық институтын тәмамдап, химия және биология пәндерінің мұғалімі мамандығын алды. Жоғары білімді маман ретінде еңбек жолын бірден білім беру саласына арнады.
Бүгінгі таңда Ақтөбе облысы Ойыл ауданы Ойыл селосындағы Ойыл қазақ орта мектебінде химия пәнінің мұғалімі болып қызмет атқарып келеді. Жалпы педагогикалық еңбек өтілі – 32 жыл. Осы жылдар ішінде ол өзін білікті де тәжірибелі ұстаз ретінде танытып, «педагог-зерттеуші» санатына ие болды.
Ұстаз өз қызметінде оқушыларға сапалы білім берумен қатар, олардың шығармашылық қабілеттерін дамытуға, ғылыми-зерттеушілік дағдыларын қалыптастыруға ерекше мән береді.
Салтанат Бижанова кәсіби біліктілігін үнемі жетілдіріп отыратын ұстаз. Ол әр жылдары біліктілік арттыру курстарынан өтіп, түрлі семинарлар мен конференцияларға, олимпиадаларға белсенді қатысып келеді. Бұл оның педагогикалық шеберлігінің үнемі дамып отыруына негіз болды.
Еңбек жолында көптеген жетістіктерге қол жеткізген ұстаз түрлі деңгейдегі марапаттарға ие болған. Атап айтқанда, бірнеше мәрте Құрмет грамоталарымен марапатталып, «Ең үздік жетекші» атағын иеленді. Облыстық педагогикалық олимпиадада жүлделі орын алып, «Облыстың үздік мұғалімі» және «Облыстың үздік жетекшісі» атанды. Сондай-ақ облыс әкімінің грантына ие болып, «Жаңашыл мұғалім» номинациясымен марапатталды.
Кейінгі жылдары да оның жетістіктері жалғасын тауып, республикалық және облыстық байқаулар мен олимпиадаларда жоғары нәтиже көрсетіп келеді. «Жаңашыл мұғалім – 2020» республикалық олимпиадасында үздік нәтиже көрсетіп, «Үздік авторлық бағдарлама» республикалық конкурсының жүлдегері атанды. 2023 жылы жас ұрпақты тәрбиелеудегі белсенді еңбегі үшін «Аманат» партиясының Алғыс хатына ие болды.
Салтанат Бижанова – өз мамандығына адал, үздіксіз ізденіс үстінде жүретін, шәкірт жүрегіне жол таба білген ұстаз.