ЕҢБЕК АДАМЫ

Қалиева Қарылға Шәкірқызы – жас ұрпақтың білімге қызығушылығын арттыруға және олардың рухани-мәдени дамуына өлшеусіз үлес қосқан кәсіби кітапханашы. Ол 40 жылдық еңбек жолында шәкірттерге білім мен ақпаратқа деген сүйіспеншілікті насихаттап келеді. 1965 жылы 3 наурызда Батыс Қазақстан облысы Қаратөбе ауданы Егіндікөл ауылында дүниеге келген. 1972 жылы Егіндікөл орта мектебіне қабылданып, 1982 жылы бітірген. Арнаулы орта білім алып, мамандығы бойынша кітапханашы ретінде Ақтөбе облысы Ойыл ауданының Құрман орта мектебінде қызмет атқарады.

Осы уақыт ішінде Қарылға Қалиева өз ісіне адалдық танытып, әрбір шәкірттің білімге деген қызығушылығын арттыруға, олардың шығармашылық және рухани дамуына үлес қосып келеді. Оның еңбегі бірнеше мәрте жоғары бағаланып, марапаттарға ие болды. 2010 жылы «Кітапхана жұмысын ақпараттық жаңа технологиялар негізінде ұйымдастыру» семинарында көрсеткен жұмысы үшін алғыс хат алды, 2011 жылы білім беру саясатын жүзеге асырудағы кәсіби үлесі үшін Құрмет грамотасымен марапатталды, «Мерейтой-2014» байқауында кәсіби шеберлігі үшін мақтау қағазын алды. 2018 жылы «Воспитание патриотизма на основе изучения историко-культурного наследия Актюбинской области» шарасында мадақтама алса, сол жылы «Рухани жаңғыру» бағдарламасы аясында «Үздік мектеп кітапханашысы-2018» атағына ие болды. 2018 жылы Ақтөбе облысының білім басқармасынан, 2019 жылы тамыз кеңесінің отырысында, 2022 жылы аудандық семинарда, ал 2023 және 2024 жылдары Ойыл аудандық білім бөлімінен алғыс хаттармен марапатталды.

Қалиева Қарылға Шәкірқызы – кәсіби біліктілігі, адалдығы және шығармашылық еңбегі арқылы жас ұрпаққа білімнің құндылығын көрсете білген еңбек адамы.

Ақтөбе облыстық кәсіподағы