«DALASKILLS–2026»: АҚТАУДА АУҚЫМДЫ ЧЕМПИОНАТ БАСТАЛДЫ

12 мамыр күні Маңғыстау облысы, Ақтау қаласындағы «Ақтау технологиялық қызмет көрсету колледжі» базасында «DalaSkills» чемпионатының салтанатты ашылу рәсімі өтті.

Шара аясында ерекше білім беру қажеттіліктері бар тұлғаларға арналған облыстық «Abilympics» чемпионаты ұйымдастырылуда. Додаға еліміздің 10 өңірінен, атап айтқанда Ақтөбе, Атырау, Батыс Қазақстан, Жамбыл, Қызылорда, Түркістан, Маңғыстау облыстарынан, сондай-ақ Алматы, Шымкент және Талдықорған қалаларынан қатысушылар жиналды.

Чемпионаттың цифрлық көрсеткіштері:

• «DalaSkills» қатысушылары: 70-тен астам студент;

• «Abilympics» қатысушылары: Ақтау қаласы, Мұнайлы және Түпқараған аудандарынан 40-тан астам мектеп оқушысы;

• Кәсіби бағдар алушылар: 150 оқушы;

• Сарапшылар тобы: 60-тан астам эксперт-компатриот және 13 тәуелсіз сарапшы;

• Қолдаушылар: 40 ерікті студент және 25-тен астам әлеуметтік серіктес ұйым.

• Әлеуметтік әріптестік аясында іс-шараға Салалық кәсіподақтың Маңғыстау облыстық ұйымының төрағасы Тарбия Анайбекқызы Баймбетова қатысты.

Ақтау бүгінде еліміздегі ең ерекше әрі ауқымды кәсіби алаңдардың біріне айналды. 12–15 мамыр аралығында өтіп жатқан «DalaSkills–2026» республикалық чемпионаты бұл тек білім бәсекесі емес, ұлттық мұра мен заманауи технологиялар тоғысқан бірегей кеңістік.

Колледж базасында ұйымдастырылған шеберлік алаңдарында киіз басу, былғары өңдеу, құрақ құрау, ұлттық әшекейлер жасау, киімдерді жобалау мен цифрлық модельдеу, сондай-ақ бау тоқу сияқты дәстүрлі өнер түрлері қайта жаңғырып жатыр.

Сонымен қатар, қатысушылар ұлттық тағамдар, кондитерлік және нан өнімдері, сүт өнімдерін әзірлеуден жарысып, су биоресурстарын өңдеу технологияларын паш етуде.

Чемпионаттың басым бағыттарының бірі - этнотуризм. Қатысушылар ұлттық мәдениетті заманауи туризм индустриясына енгізудің жаңа форматтарын ұсынып, тың жобаларын қорғауда.

Маңғыстау өңірі - еліміздің ең ірі туристік орталықтарының бірі. Мемлекет басшысы Қасым-Жомарт Тоқаев өңірдің табиғи ландшафты мен тарихи ескерткіштерін пайдалана отырып, Маңғыстауды халықаралық деңгейдегі туристік хабқа айналдырудың маңыздылығын бірнеше рет атап өткен болатын.

Осы орайда «DalaSkills» чемпионаты өңірлік экономиканы дамытуға, ұлттық брендтерді ілгерілетуге және жаңа кәсіби бағыттарды қалыптастыруға бағытталған стратегиялық жоба болып табылады.

Чемпионаттың басты ерекшелігі - дәстүр мен қазіргі заманның үйлесімі. Мұнда бабалар мұрасы жай ғана жәдігер емес, бүгінгі күннің нақты кәсіби дағдысына (hard skills) айналуда.

Инклюзия және тең мүмкіндіктер: Биыл алғаш рет «DalaSkills» аясында ерекше білім беру қажеттіліктері бар жандарға арналған «Abilympics» чемпионаты ұйымдастырылды.

Көрме форматында өткен бұл бағытта 40-тан астам оқушы 12 құзыреттілік бойынша (қолөнер, аспаздық, этнотуризм және т.б.) өз шеберліктерін көрсетті. Бұл әр баланың шығармашылық әлеуетін ашып, қоғамға бейімделуіне жасалған маңызды қадам.

Іс-шара жоғары деңгейде ұйымдастырылып, қатысушылардың қауіпсіздігі мен денсаулығына баса назар аударылды. Медициналық қызмет пен құқық қорғау органдарының жұмысы жүйелі үйлестірілген.

«DalaSkills» техникалық және кәсіптік білім беру жүйесінің әлеуетін арттырып, жұмысшы мамандықтарының беделін көтеретін бірегей алаң. Жоба ұлттық құндылықтарды сақтай отырып, еңбек нарығына қажетті білікті кадрларды даярлауға жаңа серпін береді.

Маңғыстау облыстық ұйымы