БІЛІМ ҚЫЗМЕТКЕРЛЕРІ АРАСЫНДАҒЫ ШЫҒАРМАШЫЛЫҚ БӘСЕКЕЛЕСТІК
Ақтөбе облысының Әйтеке би аудандық білім қызметкерлері кәсіподақ ұйымының қолдауымен ұлттық мәдени құндылықтарды дәріптеу және педагогтердің шығармашылық қабілеттерін дамыту мақсатында аудандық «Этно ауыл» ұлттық көрме байқауы өтті. Байқаудың басты мақсаты — тарихи-этнографиялық мұраны насихаттау, ұлттық өнерге қызығушылықты арттыру және педагогтер арасында шығармашылық ынтымақтастықты қолдау болды. Бұл шара «Біртұтас тәрбие» бағдарламасы мен «Шабыт» жобасының аясында ұйымдастырылды.
«Этно ауыл» көрме байқауына ауданның әртүрлі білім беру ұйымдарынан 97 педагог, 14 команда болып қатысты. Байқау үш кезеңнен тұрды, әр кезеңде қатысушылар ұлттық мәдениет пен дәстүрді жан-жақты көрсетуге тырысты. Командалар өздерінің этнографиялық экспозицияларын ұсынды, бұл шара ұлттық мұраны жаңғыртуға және жас ұрпақтың қызығушылығын арттыруға бағытталды.
Байқаудың үш негізгі кезеңі
«Дәстүрлі қолөнер» — ұлттық киімдер, зергерлік бұйымдар, тоқыма, ағаш өңдеу секілді қолөнер туындылары ұсынылды. Бұл бөлімде қазақ халқының қолөнер шеберлігі мен дәстүрлері кеңінен насихатталды.
«Ұлттық тағамдар» — дәстүрлі қазақ асханасындағы тағамдарды таныстыру және олардың дайындалу әдісін көрсету. Әр команда ұлттық тағамдардан дәмді ас әзірлеп, өздерінің шеберліктерін паш етті.
«Этно үй» — қазақтың дәстүрлі киіз үйі мен оның ішкі безендірілуі, тұрмыстық заттарының макеттері ұсынылды. Бұл бөлімде әр команда өздерінің шығармашылық қабілеттерін толық көрсетуге мүмкіндік алды.
Байқау қорытындысы бойынша жеңімпаздар мен номинация иелері анықталды.
Бас жүлде – «Бірлік» командасы, Қарашатау жалпы орта білім беретін мектебі;
І орын – «Т.Жүргенов ауылы» командасы, Т.Жүргенов атындағы жалпы орта білім беретін мектебі;
ІІ орын – «Мағжан ауылы» командасы, М.Жұмабаев атындағы жалпы орта білім беретін мектебі;
ІІІ орын – «Jabasak EthnoLand» командасы, Жабасақ жалпы орта білім беретін мектебі.
Сонымен қатар, бірнеше номинациялар бойынша үздіктер анықталды:
«Үздік қолөнер шебері» номинациясы – «Алтын тұмар» командасы, Талдысай жалпы орта білім беретін мектебі;
«Үздік ұлттық киім» номинациясы – «Көшпенділер» командасы, Жарөткел негізгі орта білім беретін мектебі;
«Көрермен көзайымы» номинациясы – «Шебер қолдар» командасы, Абай атындағы жалпы орта білім беретін мектебі.
Қатысушылардың таланты мен еңбегі жоғары бағаланып, олардың үздік шығармашылық туындылары арнайы дипломдармен және қаржылай сыйлықтармен марапатталды.
Байқаудың қорытындысы бойынша әрбір педагог өзінің ұлттық мәдениетке деген сүйіспеншілігі мен шығармашылық потенциалын паш етіп, ауданның білім беру саласының дамуына үлкен үлес қосты. Бұл шара педагогтер мен оқушылар үшін ерекше маңызға ие болды. Осылайша, «Этно ауыл» ұлттық көрме байқауы Әйтеке би ауданында ұлттық мәдениетке деген сүйіспеншілікті, шығармашылықты және ұлтты құрметтеуді дәріптеу мақсатында үлкен қадам болды.
