БАЙҒАНИН АУДАНЫНДАҒЫ КӘСІПОДАҚ МҮШЕЛЕРІМЕН КЕЗДЕСУ

Ақтөбе облыстық білім және ғылым қызметкерлері кәсіподағының мамандары жұмыс сапарымен Байғанин ауданына барды. Іссапар аясында кәсіподақ өкілдері Байғанин техникалық колледжінде, Байғанин ауданының психологиялық-педагогикалық түзету кабинетінде, Қ.Мұханбетқалиұлы атындағы орта мектеп-гимназиясында, Т.Жармағамбетов атындағы орта мектепте, Б.Тәжібаев атындағы балалар музыка мектебінде, сондай-ақ “Ақрайыс” және “Шаттық” бөбекжай-балабақшаларында болып, бастауыш кәсіподақ ұйымдарына әдістемелік көмек берді.

Сапардың басты мақсаты – өңірдегі бастауыш кәсіподақ ұйымдарының қызметін жандандыру, кәсіподақ мүшелерімен тікелей жүздесу арқылы олардың ұсыныс-пікірлерін тыңдап, өзекті мәселелерді талқылау, сондай-ақ әдістемелік көмек көрсету болды.

Әрбір білім беру мекемесінде бастауыш кәсіподақ ұйымының қызметі жан-жақты талданып, кәсіподақ төрағаларымен және мүшелерімен кездесулер өткізілді. Кездесу барысында кәсіподақ ұйымының жұмысы, алдағы жоспарлары, жұмыс барысында туындайтын мәселелер және оларды шешу жолдары кеңінен сөз болды.

Кәсіподақ мүшелері әлеуметтік-еңбек қатынастары, педагогтардың құқықтары мен әлеуметтік кепілдіктері, білім беру саласындағы соңғы өзгерістер туралы сұрақтар қойып, мазмұнды жауаптар алды. Сонымен қатар, облыстық кәсіподақ мамандары еңбек заңнамасы, ұжымдық шарттардың тиімді жүзеге асырылуы, кәсіподақ қозғалысының маңызы мен рөлі жөнінде әдістемелік кеңестер берді. Кездесуде кәсіподақ мүшелері үшін заңгер мамандармен онлайн форматта сұрақ-жауап мүмкіндігі ұйымдастырылды.

Айта кетейік, осындай кездесулер кәсіподақ ұйымдарының қызметін жүйелі түрде үйлестіруге, білім беру мекемелеріндегі әлеуметтік әріптестік тетіктерін нығайтуға және кәсіподақ мүшелерінің еңбек құқықтары мен заңды мүдделерін қорғауда тиімді тәжірибе алмасуға септігін тигізеді.