БАСТЫ НАЗАРДА – ЕҢБЕК АДАМЫН ҚОРҒАУ

Жамбыл облысы оқу-ағарту, ғылым және жоғары білім қызметкерлерінің Жергілікті кәсіподағының Біріккен комитеті филиалының жұмыс жоспарына сәйкес кезекті ІІІ Пленум отырысы өтті. Алқалы жиынды филиал төрағасы Жанболат Орынбеков ашып, жүргізіп отырды.

Ол өз сөзінде Мемлекет басшысы Қ.Ж.Тоқаевтың 2025 жылды Жұмысшы мамандықтары жылы деп жариялауына байланысты Ұжымдық шартпен білім беру ұйымдарындағы жұмысшы мамандық иелеріне белгіленген жеңілдіктер мен әлеуметтік кепілдіктерге ерекше басымдық берілгенін айтып, ұсынылған жеңілдіктер мен кепілдіктердің жұмысшы мамандардың әл-ауқатын арттыруға, олардың кәсіби өсуіне және біліктілігін арттыруына ықпал ететінін жеткізді.

Жарыссөз барысында облыстық білім басқармасының «Мөлдір бұлақ» облыстық оқу-сауықтыру орталығының директоры Салтанат Құрманова әлеуметтік әріптестік аясындағы жұмыстары кәсіподақ ұйымымен тығыз байланыста жүзеге асырылып жатқанын айтса, Абай атындағы мамандандырылған дарынды балаларға арналған мектеп-гимназияның бастауыш кәсіподақ жетекшісі Гүлбану Бейсенова кәсіподақ ұйымдары тарапынан атқарылған жұмыстарға тоқталды. Ал құқықтық мәселелер бойынша атқарылған жұмыстар туралы ұйымының құқықтық инспекторы Абзал Сейтқадыр есепті баяндама жасады.

Пленум мүшелері өзіне берілген құзырет аясында 2025 жылғы Бақылау-тексеру комиссиясының есебін тыңдап, 2026 жылға арналған қаржылық кіріс-шығыс сметасын бекітті. Жиында қабылданған Қаулыға сәйкес алдағы уақытта еңбек адамына қатысты құқықтық қызметтің тиімділігін арттыру, еңбек қорғау мен қауіпсіздік талаптарын күшейту, сондай-ақ оңтайлы еңбек жағдайларын жасауға бағытталған қоғамдық бақылауды күшейту міндеттері белгіленді.

Жиын соңында сөз алған Жергілікті кәсіподақ ұйымы аппаратының басшысы Бейбіт Бекназаров еңбек адамдарының әлеуметтік қорғалуы кәсіподақ жұмысының басты бағыты екенін атап өтіп, филиалдың жұмысына оң баға берді.

Жамбыл облыстық ұйымы