АТЫРАУ ОБЛЫСТЫҚ ҰЙЫМЫНДА ЖАҢА ТӨРАҒА
17 наурыз күні «Атырау облысы білім және ғылым қызметкерлерінің кәсіптік одағы» қоғамдық бірлестігінің кезектен тыс XXXI конференциясы өткізілді. Алқалы жиынға өңірдің жеті ауданынан және Атырау қаласынан кәсіподақ филиалдарының, бастауыш кәсіподақ ұйымдарының төрағалары мен белсенділері қатысты.
Конференция барысында делегаттар мандат комиссиясының хабарламасын тыңдап, мақұлдады. Одан кейін «Атырау облысы білім және ғылым қызметкерлері кәсіптік одағының Құрманғазы аудандық комитеті» филиалының төрағасы А.Изжанов Аққали Қабижанұлы Ахметтің кандидатурасын қоғамдық бірлестіктің төрағасы лауазымына ұсынды.
Х. Досмұхамедов атындағы Атырау университетінің профессоры, тарих ғылымдарының докторы, белгілі тарихшы-ғалым Шахман Нағымұлы үміткердің еңбек жолы мен кәсіби жетістіктерімен таныстырды.
Ахмет Аққали Қабижанұлы 1966 жылғы 6 наурызда Атырау облысы Махамбет ауданы Таңдай ауылында дүниеге келген. 1983 жылы Гурьев педагогикалық институтының тарих-филология факультетіне түсіп, 1990 жылы тарих, қоғамтану және құқық пәндерінің мұғалімі мамандығы бойынша тәмамдаған. Еңбек жолын білім беру саласында бастап, мектепте мұғалім, кейін жоғары оқу орнында оқытушы, факультет деканы, проректор секілді жауапты қызметтерді атқарды. 2003 жылы кандидаттық, 2010 жылы докторлық диссертацияларын қорғаған тарих ғылымдарының докторы, профессор.
Конференция делегаттары ұсынылған кандидатураны бірауыздан қолдады.
Конференцияда сөз сөйлеген Аққали Қабижанұлы өзіне көрсетілген жоғары сенім үшін әріптестеріне алғысын білдіріп, алдағы уақытта қоғамдық бірлестікте қалыптасқан игі дәстүрлерді жалғастыруға және жаңа бастамаларды жүзеге асыруға бар күш-жігерін, білімі мен тәжірибесін жұмсайтынын атап өтті.
Атырау облыстық ұйымы
