ӘЛЕУМЕТТІК ӘДІЛЕТТІЛІК ЖӘНЕ ЕҢБЕК ҚҰҚЫҒЫ: ШЫМКЕНТТЕ МАҢЫЗДЫ ТАЛҚЫЛАУ ӨТТІ

Оқу-ағарту, ғылым және жоғары білім қызметкерлері салалық кәсіподағының Шымкент қалалық ұйымы (төрайымы — Л. Тұрғынбаева) және мәдениет, спорт, туризм және ақпарат қызметкерлерінің салалық кәсіподағының қалалық филиалы (төрағасы — Р. Шеримов) өкілдерінің бірлескен кеңесі өтті.

Кеңесте жаңа Конституция жобасының ережелері және оның білім, мәдениет және спорт салаларындағы еңбек қатынастарын нығайтуға ықпалы талқыланды. Қазіргі уақытта жоба бастауыш кәсіподақ ұйымдарында және еңбек ұжымдарында кеңінен қарастырылуда. Қызметкерлер жалақы деңгейі, еңбек қауіпсіздігі, жұмыспен қамту тұрақтылығы және әлеуметтік кепілдіктер мәселелерін көтеруде. Кәсіподақтар үшін бастысы – ұсынылған өзгерістердің еңбек адамдарының өмір сапасын арттыруға және әділеттілікті қамтамасыз етуге бағытталуы.

Жоба аясында еңбек ету құқығына нақты әлеуметтік мазмұн беріледі, мемлекет жұмыспен қамтуға жәрдемдесу, қайта даярлау, қауіпсіз еңбек жағдайларын қамтамасыз ету және негізсіз шешімдерден қорғау міндетін күшейтеді. Бұл еңбек қатынастарында әлеуметтік жауапкершілікті арттыруға бағытталған.

Сондай-ақ цифрландыру және технологиялық жаңғырту үдерістері қызметкерлердің құқықтары мен еңбек жағдайларын нашарлатуға негіз болмауы тиіс екені атап өтілді. Жаңарту шаралары адам капиталының дамуына және қызмет сапасының артуына қызмет етуі қажет.

Бюджет саласы қызметкерлерінің жалақысын арттыру мәселесі де басым бағыт ретінде белгіленді. Кәсіподақтар Конституция жобасын ұжымдарда талқылауды және сараптамалық жұмысты жалғастырады. Болашақ Конституция нормалары еңбек құқықтарын күшейтіп, азаматтардың ертеңгі күнге сенімін арттыруы тиіс.

Шымкент қалалық ұйымы